‘कुछ कुछ होता है’, ‘हर दिल जो प्यार करेगा’ आणि ‘बादल’ अशा चित्रपटांमध्ये बालकलाकार म्हणून काम करणाऱ्या अभिनेत्री सना सईदच्या वडिलांचं निधन झालं आहे. दीर्घ आजारामुळे त्यांचं निधन झाल्याचं सांगण्यात येत असून लॉकडाउनमुळे सनाची आणि वडिलांची अखेरच्या क्षणी भेटदेखील झाली नाही. २२ मार्च रोजी जनता कर्फ्युच्या दिवशी सनाच्या वडिलांचं निधन झालं.
काही दिवसापूर्वी सना लॉस एन्जलिस येथे गेली होती. मात्र लॉकडाउन असल्यामुळे तिला तेथेच अडकून रहावं लागलं. याच काळात तिच्या वडिलांचं निधन झालं. मात्र तिला अखेरच्या क्षणी वडिलांची भेट घेता आली नाही. सनाच्या वडिलांना कित्येक वर्षापासून मधुमेहाचा त्रास होता. याच आजारपणात त्यांचं निधन झालं आहे.
