सोन्याची झळाळी उतरली, प्रति तोळा पन्नास हजाराच्याही खाली
![](https://mahaenews.com/wp-content/uploads/2019/05/akshaya-tritiya-gold-7_201905233428.jpg)
नवी दिल्ली – गेल्या काही दिवसांपासून सोन्याच्या किमतीत नियमित वाढ होत होती. प्रति तोळा सोनं 55 हजारांच्या वर गेलं होतं. मात्र बुधवारी सोन्याला मिळाली झळाळी कमी झाली आहे. आंतरराष्ट्रीय बाजारात सोन्याचा भाव प्रति औंस 1, 872.19 डॉलर्स या पातळीवर आला. भारतातही याचे पडसाद उमटले असून सोन्याचा भाव तीन टक्क्यांपेक्षा जास्त घसरून प्रति १० ग्रॅम ४९,९५५ रुपये इतका झाला. गुंतवणूकदारांनी केलेल्या नफारुपी विक्रीमुळे तसेच कोरोनावर लस मिळत असल्याच्या वृत्तानं गुंतवणूकदार निश्चिंत झाल्यामुळे सोन्याच्या खरेदीऐवजी विक्रीकडे कल दिसून येत आहे, परिणामी सोन्याचे भाव घसरत आहेत.
अमेरिकेतील गोल्ड फ्युचर्समध्येही २.४ टक्क्यांची घसरण होऊन ते प्रति औंस १,९०० डॉलर्सवर आले आहेत. गेल्या सत्रामध्ये तब्बल १५ टक्क्यांनी घसरलेले चांदीचे भावही आणखी २.८ टक्क्यांनी घसरले व प्रति औंस २४.११ डॉलर्स झाले आहेत. आंतरराष्ट्रीय बाजारातील घडामोडींमुळे भारतातही सोन्याचे व चांदीचे भाव घसरत आहेत.
काही महिने सोन्यामध्ये असलेल्या तेजीला लगाम बसत असून सोने आंतरराष्ट्रीय बाजारात प्रति औंस १,८०० डॉलर्सच्या पातळीवर येऊ शकतं असं वृत्त तज्ज्ञांच्या हवाल्यानं रॉयटर्सनं दिलं आहे. अमेरिकी डॉलर्सच्या भावावर आंतरराष्ट्रीय बाजारातील सोन्याचे भाव वर खाली होत असल्यामुळे सगळ्यांचं लक्ष डॉलरकडे लागलेलं आहे. आंतरराष्ट्रीय बाजारात डॉलर वधारला तर सोनं महाग होतं व डॉलर घसरला तर सोनं स्वस्त होतं. गेल्या काही महिन्यांमध्ये अमेरिकी रोख्यांच्या परताव्यामध्ये झालेल्या वाढीमुळे काही काळ डॉलरची मागणी वाढत होती, परिणामी सोनं महाग होत होतं.
एका दिवसातील घसरणीचा विचार केला तर तब्बल सात वर्षात सोनं पहिल्यांदाच एकाच दिवशी इतकं घसरलं आहे. अर्थात, एका वर्षाचा विचार केला तर मात्र सोन्याचे भाव तब्बल २५ टक्क्यांनी वधारले आहेत. कोरोना महामारीमुळे वैश्विक मंदीच्या भीतीनं ग्रासलेल्या जागतिक गुंतवणूकदारांनी आसरा म्हणून सोन्याच्या खरेदीचा सपाटा लावला होता, परिणामी सोन्याचे भाव आंतरराष्ट्रीय बाजारात भडकले होते. येत्या काळातही आर्थिक मंदीवर उतारा म्हणून मध्यवर्ती बँका आपल्या तिजोऱ्या मोकळ्या सोडण्याची शक्यता बघता सोन्याचा भाव पुन्हा प्रति औंस २,००० डॉलर्सकडे जाण्याची शक्यता तज्ज्ञांनी वर्तवली आहे.