वाराणसीत ५५० कोटींहून अधिक रकमेच्या प्रकल्पांची सुरुवात
![](https://mahaenews.com/wp-content/uploads/2018/07/Narendra-Modi_2017081825.jpg)
जनताच आपले पक्षश्रेष्ठी – नरेंद्र मोदी
वाराणसी : पंतप्रधान नरेंद्र मोदी यांनी मंगळवारी वाराणसी या आपल्या लोकसभा मतदारसंघात ५५० कोटी रुपयांच्या विकास प्रकल्पांची सुरुवात केली. या लोकसभा मतदारसंघातली जनताच आपले पक्षश्रेष्ठी असल्याचे या वेळी मोदी म्हणाले.
या शहरात केलेले काम सुस्पष्ट दिसत आहे, गेल्या चार वर्षांत शहराचा चेहरामोहरा बदलला आहे, यापूर्वीच्या सरकारच्या काळात सर्व देवाच्या भरवशावरच होते, असे मोदी यांनी आपला दोन दिवसांचा दौरा आटोपताना स्पष्ट केले.
वाराणसीचा खासदार या नात्याने आपण केलेल्या कामांची माहिती मतदारांना देणे ही आपली जबाबदारी आहे, असे मोदी जाहीर सभेत म्हणाले. तुम्ही पंतप्रधानपदाला जबाबदारी दिली असली तरी लोकसभेचा सदस्य आणि मतदारसंघातील खासदार या नात्याने केलेली कामे तुमच्यासमोर ठेवणे ही तितकीच आपली जबाबदारी आहे, असे पंतप्रधान म्हणाले.