लखनऊ: आगामी लोकसभा निवडणुकीत पंतप्रधान नरेंद्र मोदी यांच्या नेतृत्वाखालील भाजपला पराभूत करण्यासाठी समाजवादी पार्टीचे नेते अखिलेश यादव यांनी कंबर कसली आहे. त्यासाठी बसपाशी आघाडी करण्याचा निर्णय त्यांनी घेतला आहे. आघाडीत बसपला जादा जागा देऊन ज्युनिअर पार्टनर बनण्याची तयारीही अखिलेश यांनी दाखवली आहे. त्यामुळे आगामी लोकसभा निवडणूक भाजपला जड जाण्याची चिन्हे दिसत आहेत.
मैनपुरी येथे रविवारी झालेल्या एका जाहीर सभेत अखिलेश यादव यांनी बसपासाठी कोणताही त्याग करायला तयार असल्याचं सांगितलं. बसपासोबत आघाडी करताना दोन-चार जागा कमी मिळाल्या तरी चालतील. त्यासाठी फार तणातणी करणार नाही, असं अखिलेश यादव यांनी स्पष्ट केल्याने उत्तर प्रदेशात बसपा-सपा आघाडी होण्याची चिन्हे दिसत आहेत. आगामी लोकसभा निवडणुकीत समाधानकारक जागा मिळाल्या नाही तर स्वबळावर निवडणूक लढवू, असं मायावती यांनी यापूर्वीच स्पष्ट केलं होतं. त्यामुळे अखिलेश यांनी बॅकफूटवर येत बसपाबरोबर कोणत्याही परिस्थितीत आघाडी करण्याचे संकेत दिले आहेत.
उत्तर प्रदेशात लोकसभेच्या एकूण ८० जागा आहेत. २०१४ च्या निवडणुकीत मोदी लाटेमुळे भाजप आघाडीला ७३ जागांवर विजय मिळाला होता. त्यात सपाला ५ आणि काँग्रेसला केवळ दोन जागांवरच विजय मिळविता आला होता. विशेष म्हणजे या निवडणुकीत बसपला खातेही खोलता आले नव्हते, मात्र बसपाच्या मतांची टक्केवारी वाढली होती. शिवाय नुकत्याच झालेल्या विधानसभा निवडणुकीत बसपाने जास्त जागा पटकावल्या होत्या. समाजवादी पार्टीसोबत युती नसतानाही बसपला मोठं यश मिळालं होतं. मात्र त्यानंतर फुलपूर-गोरखपूर पोटनिवडणुकीत बसपाने सपाशी आघाडी केल्याने भाजपचा मोठा पराभव झाला होता.
