नवी दिल्ली: यूजर्सची गोपनीय माहिती उघड केल्यावरून फेसबुक कंपनी वादात सापडली असतानाच, आता पुन्हा एकदा फेसबुकच्या काळ्या कृत्यांचा पर्दाफाश झाला आहे. मीडिया रिपोर्टनुसार, फेसबुकने काही कंपन्यांसोबत ‘सीक्रेट डील’ केली होती. त्यानुसार, संबंधित कंपन्यांना यूजर्सच्या डेटाचा स्पेशल अॅक्सेस देण्यात आला होता.
वॉल स्टीट जर्नलच्या वृत्तानुसार, फेसबुकनं काही कंपन्यांसोबत ‘व्हाइटलिस्ट्स’ या नावानं करार केला होता. त्या अंतर्गत यूजर्सच्या फेसबुक फ्रेंड्ससह इतर गोपनीय माहितीचा अॅक्सेस कंपन्यांना दिला होता. यूजर्सचे मोबाइल क्रमांकही या कंपन्यांना पाहता येत होते.
फेसबुकने रॉयल बँक ऑफ कॅनडा, निसान मोटर्स को. यासारख्या कंपन्यांशी फेसबुकने ही सीक्रेट डील केली होती. या कंपन्यांच्या जाहिरातीही फेसबुकवर देण्यात आल्या होत्या. मात्र, ही माहिती देणाऱ्यांची नावे उघड केली नाहीत. दरम्यान, अलीकडेच फेसबुकनं किमान ६० डिव्हाइस निर्मात्या कंपन्यांसोबत डेटा शेअरिंग पार्टनरशिप केली होती. फेसबुकनेही ही बाब मान्य केली होती.
