यु ट्यूबच्या मुख्यालयात गोळीबार
कॅलिफोर्निया : कॅलिफोर्निया येथील युट्युब मुख्यालयात एका महिलेने अंदाधुंद गोळीबार केल्याची घटना घडली. या गोळीबारात ४ जण जखमी झाले असून एकाची प्रकृती गंभीर असल्याचे वृत्त आहे. गोळीबार केल्यानंतर हल्लेखोर महिलेने स्वत: वर गोळी झाडत आत्महत्या केली.
स्थानिक पोलिसांनी दिलेल्या माहितीनुसार, युट्युबच्या मुख्यालयात हल्लेखोर महिलेचा मृतदेह आढळून आला. या महिलेने अंदाधुंद गोळीबार केल्यानंतर युट्युब मुख्यालयात धावपळ सुरू झाली. सुरक्षा रक्षकांनी कर्मचाऱ्यांना युट्युब मुख्यालयातून सुखरूप बाहेर काढण्यास सुरुवात केली. गोळीबाराची माहिती मिळाल्यानंतर पोलिसांनी तात्काळ घटनास्थळी धाव घेतली. या हल्ल्यानंतर मुख्यालय तात्काळ बंद करण्यात आले आहे.
घरगुती वादातून हा हल्ला झाला असल्याची शक्यता व्यक्त केली जात असून तपास सुरू आहे. गुगलचे सीईओ सुंदर पिचई यांनी ही घटना दुखद असल्याचे म्हणत युट्युबच्या कर्मचाऱ्यांच्या पाठीशी उभे राहण्याची वेळ असल्याचे त्यांनी ट्विटमध्ये नमूद केले आहे.