पोलीस भरतीच्या उमेदवारांसाठी सर्व मैदाने मोफत उपलब्ध होणार; गृहराज्यमंत्री योगेश कदम यांची घोषणा
नागपुरातील रेशीमबाग मैदानावर तरुणांशी साधला संवाद; ग्रामीण आणि दुष्काळी भागातील उमेदवारांना दिलासा देण्याचा प्रयत्न

नागपूर : पोलीस भरतीची तयारी करणाऱ्या तरुणांना सरावासाठी राज्यातील सर्व मैदाने मोफत उपलब्ध करून देण्याचा निर्णय घेण्यात आला आहे, अशी घोषणा गृहराज्यमंत्री योगेश कदम यांनी केली. नागपुरातील रेशीमबाग मैदानावर पोलीस भरतीची तयारी करणाऱ्या उमेदवारांशी संवाद साधताना त्यांनी ही माहिती दिली. ग्रामीण आणि दुष्काळी भागातून आलेल्या तरुणांच्या अडचणी समजून घेत त्यांना भरती प्रक्रियेत दिलासा देण्यासाठी सरकार प्रयत्नशील असल्याचेही त्यांनी सांगितले.
रेशीमबाग मैदानावर कदम यांनी पोलीस भरतीसाठी सराव करणाऱ्या तरुणांशी चर्चा केली. यावेळी उमेदवारांनी मांडलेल्या अडचणी जाणून घेत त्यांनी मैदानांच्या उपलब्धतेबाबत सरकारने घेतलेल्या निर्णयाची माहिती दिली. या निर्णयामुळे पोलीस भरतीची तयारी करणाऱ्या उमेदवारांना सरावासाठी मैदानांचा वापर करता येणार आहे.
पोलीस भरतीसाठी अर्ज करणाऱ्या उमेदवारांमध्ये ग्रामीण भागातील तरुणांचे प्रमाण मोठे आहे. सुमारे ९० टक्के उमेदवार ग्रामीण भागातील असल्याचे कदम यांनी सांगितले. दुष्काळी भागातील तरुणांना भरती प्रक्रियेत शक्य तितका दिलासा देण्याचा प्रयत्न सुरू असल्याचेही त्यांनी स्पष्ट केले. यावेळी त्यांनी ‘मिशन खाकी’ या उपक्रमाची माहिती दिली.
हेही वाचा – मुंबईतील प्रवास होणार अधिक वेगवान; ३१ किमी लांबीची ‘पाताल लोक’ बोगदा प्रणाली प्रस्तावित
सक्तीच्या कर्जवसुलीवर कठोर कारवाईचा इशारा
अकोला जिल्ह्यात शेतकऱ्यांकडून सक्तीने कर्जवसुली होत असल्याच्या तक्रारींबाबतही योगेश कदम यांनी भूमिका स्पष्ट केली. या प्रकरणी जिल्हाधिकाऱ्यांशी चर्चा करण्यात आली असून, संबंधितांविरोधात गुन्हे दाखल करण्याच्या सूचना दिल्याची माहिती त्यांनी दिली. राज्यात कुठेही शेतकऱ्यांकडून सक्तीने वसुली केल्यास संबंधितांवर कठोर कारवाई केली जाईल, असा इशाराही त्यांनी दिला.
SIR प्रक्रियेवरही भाष्य
विशेष सखोल पुनरीक्षण (SIR) प्रक्रियेबाबत बोलताना देशाबाहेरील व्यक्तींची नावे मतदार यादीतून वगळली जाणार असतील, तर त्यात गैर काय, असा सवाल योगेश कदम यांनी उपस्थित केला.




