अभिनेता सैफ अली खानला धमकी मिळाल्याने मुंबईत खळबळ; झिशान अख्तरच्या नावाचा वापर?
धमकीचा स्रोत शोधण्यासाठी मुंबई पोलिसांचा तपास सुरू; AI तंत्रज्ञानाद्वारे धमकी दिल्याच्या आरोपाखाली बंगळुरूमधून वैभव मिश्रा अटकेत

मुंबई : बॉलिवूडमधील कलाकारांना धमक्या मिळण्याच्या घटनांमुळे चिंता व्यक्त होत असतानाच अभिनेता सैफ अली खान यालाही धमकी मिळाल्याची माहिती समोर आली आहे. या प्रकरणाची मुंबई पोलिसांनी गंभीर दखल घेत तपास सुरू केला आहे. मिळालेल्या माहितीनुसार, सैफ अली खानला देण्यात आलेल्या धमकीमध्ये झिशान अख्तरच्या नावाचा उल्लेख करण्यात आल्याचा दावा केला जात आहे.
बाबा सिद्दीकी हत्या प्रकरणात झिशान अख्तरचे नाव समोर आले होते. या प्रकरणात तो फरार आरोपी असल्याचे वृत्त आहे. अशा परिस्थितीत त्याच्या नावाने सैफ अली खानला धमकी मिळाल्याने पोलिसांकडून या प्रकरणाचा विविध बाजूंनी तपास केला जात आहे. धमकी देणारी व्यक्ती कोण आहे, धमकीचा स्रोत काय आहे आणि झिशान अख्तरच्या नावाचा वापर का करण्यात आला, याचा शोध पोलीस घेत आहेत.
हेही वाचा – पुण्यातील खाऊ गल्ल्यांवर FDAची धडक कारवाई; ८ दुकानांना व्यवसाय बंद करण्याच्या नोटिसा!
AI तंत्रज्ञानाद्वारे धमकी दिल्याच्या आरोपाखाली एकाला अटक
दरम्यान, धमकीच्या घटनांशी संबंधित एका स्वतंत्र तपासात मुंबई पोलिसांनी बंगळुरूमधून वैभव मिश्रा (वय ३०) याला अटक केली आहे. तो आयआयटी पदवीधर असल्याची माहिती समोर आली आहे. आर्टिफिशियल इंटेलिजन्स (AI) तंत्रज्ञानाचा वापर करून धमकी दिल्याचा आरोप त्याच्यावर आहे. मात्र, त्याचा कोणत्याही गुन्हेगारी टोळीशी संबंध नसल्याची माहिती मुंबई पोलिसांनी दिल्याचे वृत्त आहे.
दोन्ही प्रकरणांचा संबंध आहे का?
सैफ अली खानला मिळालेल्या धमकीचा आणि वैभव मिश्रा याच्या अटकेचा परस्पर संबंध आहे का, हे अद्याप स्पष्ट झालेले नाही. या दोन्ही घटनांमधील संभाव्य संबंध तपासण्यासोबतच धमकीमागील व्यक्ती आणि उद्देश शोधण्याचे काम मुंबई पोलिसांकडून सुरू आहे. तपासातून अधिक माहिती समोर येण्याची अपेक्षा आहे.




