राष्ट्रवादी काँग्रेसमध्ये नाराजी नाही; सुनेत्रा पवारांच्या नेतृत्वाखाली पक्षवाढीचा निर्धार, तटकरेंचे स्पष्टीकरण

मुंबई : राष्ट्रवादी काँग्रेस पक्षाच्या प्रमुख नेत्यांची मुंबईत महत्त्वाची बैठक पार पडली. या बैठकीत पक्षाची आगामी राजकीय भूमिका, संघटनात्मक बांधणी आणि पक्षवाढीच्या नियोजनावर चर्चा झाल्याची माहिती प्रदेशाध्यक्ष खासदार सुनील तटकरे यांनी दिली. पक्षात कोणतीही नाराजी नसून दिल्लीतील बैठकही पूर्वनियोजित होती, असे स्पष्टीकरण त्यांनी दिले.

सुनेत्रा पवार यांच्या उपस्थितीत वरिष्ठ नेत्यांची बैठक

राष्ट्रवादी काँग्रेसच्या तीन ते पाच वेळा निवडून आलेल्या प्रमुख नेत्यांची राष्ट्रीय अध्यक्ष आणि उपमुख्यमंत्री सुनेत्रा पवार यांच्या उपस्थितीत बैठक झाली. आगामी काळातील पक्षाची भूमिका निश्चित करणे आणि संघटनात्मक विस्तारावर चर्चा करणे हा या बैठकीचा मुख्य उद्देश होता, असे तटकरे यांनी सांगितले.

आजची बैठक पक्षाची पुढील वाटचाल आणि संघटनात्मक बांधणीसंदर्भात होती. याशिवाय उद्या पक्षाच्या सर्व आमदारांची बैठक बोलावण्यात आली आहे. आमदारांची मते जाणून घेण्यासाठी यापूर्वीही अशा बैठका होत होत्या. अजित पवार यांच्या कार्यकाळातही आणि त्याआधीही ही प्रक्रिया सुरू होती. मात्र, नेते कामात व्यस्त असल्याने मध्यंतरी बैठका होऊ शकल्या नाहीत, असे तटकरे यांनी स्पष्ट केले.

पक्षात नाराजी नसल्याचा तटकरेंचा दावा

पक्षातील नियुक्त्या किंवा नाराजीच्या चर्चांमध्ये तथ्य नसल्याचे तटकरे यांनी सांगितले. राष्ट्रवादी काँग्रेसच्या विलिनीकरणाबाबतची चर्चा यापूर्वीच थांबली असल्याचेही त्यांनी स्पष्ट केले.

दिल्लीतील बैठकीला अनावश्यक राजकीय रंग देऊन पक्षांतर्गत मतभेद असल्याचे चित्र निर्माण करण्याचा प्रयत्न होत असल्याचे मत पक्षाच्या राष्ट्रीय प्रवक्त्यांनीही व्यक्त केले आहे.

हेही वाचा –  गोकुळच्या सत्तासंघर्षाला न्यायालयीन वळण; बहुमत असूनही अध्यक्षपदाची खुर्ची रिकामीच!

कोअर कमिटीच्या बैठकीला प्रमुख नेत्यांची उपस्थिती

राष्ट्रवादी काँग्रेसच्या कोअर कमिटीच्या बैठकीला राष्ट्रीय अध्यक्ष सुनेत्रा पवार, खासदार पार्थ पवार, प्रफुल्ल पटेल, सुनील तटकरे, धनंजय मुंडे, दिलीप वळसे-पाटील आणि छगन भुजबळ उपस्थित होते.

केंद्रीय गृहमंत्री अमित शाह यांच्यासोबत झालेल्या चर्चेच्या पार्श्वभूमीवरही या बैठकीत चर्चा होण्याची शक्यता असल्याची माहिती सूत्रांकडून देण्यात आली होती. मात्र, बैठकीनंतर तटकरे यांनी पक्षाची भूमिका आणि आगामी वाटचाल यावरच बैठकीत चर्चा झाल्याचे सांगितले.

सुनेत्रा पवार यांच्या सूचनेनुसारच अमित शाह यांची भेट

केंद्रीय गृहमंत्री अमित शाह आणि राष्ट्रवादी काँग्रेसच्या ज्येष्ठ नेत्यांच्या दिल्लीतील भेटीवरून सुरू असलेल्या चर्चांबाबत पक्षाचे राष्ट्रीय प्रवक्ते उमेश पवार यांनी स्पष्टीकरण दिले.

सुनेत्रा पवार यांनीच पक्षातील ज्येष्ठ नेत्यांचे शिष्टमंडळ अमित शाह यांची भेट घेणार असल्याची माहिती त्यांना दिली होती. तसेच भेटीसाठी वेळ उपलब्ध करून देण्याची विनंतीही केली होती. त्यामुळे ही भेट सुनेत्रा पवार यांच्या सूचनेनुसारच झाली होती, असे उमेश पवार यांनी स्पष्ट केले.

या भेटीला अनावश्यक राजकीय रंग देऊन पक्षांतर्गत मतभेदांचे कथानक तयार करण्याचा प्रयत्न दुर्दैवी असल्याचेही त्यांनी म्हटले.

शरद पवार यांच्या प्रकृतीबाबत तटकरेंची प्रतिक्रिया

दरम्यान, ज्येष्ठ नेते शरद पवार यांच्या प्रकृतीबाबतही सुनील तटकरे यांनी प्रतिक्रिया दिली. शरद पवार हे गेली सहा दशके राजकारणात सक्रिय आहेत. यापूर्वीही त्यांनी गंभीर आजारावर मात केली आहे. दुष्काळी परिस्थितीचा आढावा घेतल्यानंतर त्यांनी पुन्हा दौरे सुरू केले होते, असे तटकरे म्हणाले.

शरद पवार यांना रुग्णालयात दाखल केल्याची माहिती मिळाली असून, त्यांनी लवकर बरे व्हावे, अशी सदिच्छा तटकरे यांनी व्यक्त केली.

राष्ट्रवादी काँग्रेसमधील वरिष्ठ नेत्यांच्या बैठका, अमित शाह यांच्यासोबतची भेट आणि आगामी संघटनात्मक नियोजनाच्या पार्श्वभूमीवर पक्षाच्या पुढील राजकीय वाटचालीकडे आता लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा