पिंपरी-चिंचवडमध्ये २९ सप्टेंबरला ‘रोजगार महाकुंभ’

पिंपरी-चिंचवड : शहर आणि परिसरातील रोजगाराच्या शोधात असलेल्या तरुण-तरुणींसाठी मंगळवार, २९ सप्टेंबर २०२६ रोजी ‘पंडित दीनदयाळ उपाध्याय रोजगार महाकुंभ’ आयोजित करण्यात आला आहे. चिंचवड येथील ऑटो क्लस्टरमध्ये सकाळी ९ ते दुपारी ३ या वेळेत हा मेळावा होणार असून, पाचवी उत्तीर्ण उमेदवारांपासून उच्चशिक्षित तरुणांपर्यंत विविध पात्रतेच्या उमेदवारांना सहभागी होता येणार आहे.

आमदार सौ. उमाताई खापरे यांच्या पुढाकारातून, अनुप मोरे, तुषार हिंगे आणि जयदीप खापरे यांच्या माध्यमातून तसेच ‘युवा हब स्किल मॅनेजमेंट प्रायव्हेट लिमिटेड’ व विविध सामाजिक संस्थांच्या सहकार्याने मेळाव्याचे आयोजन करण्यात आले आहे. आयोजकांनी दिलेल्या माहितीनुसार, देवेंद्र फडणवीस यांच्या संकल्पनेतून आणि मंगलप्रभात लोढा यांच्या माध्यमातून हा उपक्रम राबविण्यात येत आहे. कार्यक्रमाला रविंद्र चव्हाण यांची प्रमुख उपस्थिती लाभणार आहे.

हेही वाचा –  ​डॉ. डी. वाय. पाटील टेक्निकल कॅम्पसमध्ये ‘Envision 2026’ MCA इंडक्शन प्रोग्राम उत्साहात संपन्न

विविध क्षेत्रांतील कंपन्यांशी थेट संवादाची संधी

बँकिंग, माहिती तंत्रज्ञान, बीपीओ, केपीओ, स्थावर मालमत्ता, उत्पादन, वाहन उद्योग आणि तंत्रज्ञान क्षेत्रांतील कंपन्यांचे प्रतिनिधी मेळाव्यात सहभागी होणार असल्याचे आयोजकांनी सांगितले. त्यांच्या माहितीनुसार, Axis Bank, ICICI Bank, Tata Motors, Hudas Technology, Wiggle Space, Bajaj आणि Hyundai यांसारख्या कंपन्यांचा सहभाग अपेक्षित आहे. उमेदवारांना त्यांच्या शिक्षण आणि कौशल्यानुसार उपलब्ध संधींची माहिती घेता येईल. पाचवी, दहावी, बारावी उत्तीर्ण उमेदवारांसह आयटीआय, पदविका, पदवी आणि अभियांत्रिकी शिक्षण घेतलेल्या तरुणांसाठीही हा मेळावा खुला आहे. त्यामुळे रोजगाराच्या शोधात असलेल्या विविध शैक्षणिक पार्श्वभूमीच्या उमेदवारांना एकाच ठिकाणी संधी मिळणार आहे.

नोकरी न मिळालेल्या उमेदवारांसाठी ‘जॉब कार्ड’

मेळाव्यात तात्काळ नोकरी न मिळालेल्या उमेदवारांची माहिती पुढील संधींसाठी संकलित करण्याकरिता ‘जॉब कार्ड’ उपक्रम राबविण्यात येणार आहे. त्यामध्ये उमेदवाराची शैक्षणिक पात्रता, कौशल्ये आणि अपेक्षित रोजगार यांची नोंद केली जाईल. भविष्यात उपलब्ध होणाऱ्या योग्य संधींशी उमेदवारांना जोडण्याचा या उपक्रमाचा उद्देश असल्याचे आयोजकांनी स्पष्ट केले.
इच्छुक उमेदवारांनी आवश्यक कागदपत्रे आणि अद्ययावत बायोडाटा घेऊन २९ सप्टेंबर रोजी वेळेत उपस्थित राहावे, असे आवाहन अनुप मोरे, तुषार हिंगे आणि जयदीप खापरे यांनी केले आहे.

महाईन्यूज-X वर फॉलो करा : महाईन्यूजला instagram वर फॉलो करा