पुणे | विधानसभा सार्वत्रिक निवडणुकीत मतदानाचा टक्का वाढविण्यासाठी शिवाजीनगर विधानसभा मतदारसंघाच्या स्वीप पथकाने पुण्यातील बालगंधर्व रंगमंदिर येथे मतदान जनजागृतीसाठी स्वाक्षरी मोहिम कार्यक्रम राबविला. यावेळी कला व साहित्य क्षेत्रातील मान्यवर तसेच रसिकांनी स्वाक्षरी करून ‘मी मतदान करणारच’ असा संकल्प करून उत्स्फूर्त प्रतिसाद दिला.
शिवाजीनगर विधानसभा मतदारसंघाचे निवडणूक निर्णय अधिकारी गजानन गुरव यांच्या मार्गदर्शनाखाली स्वाक्षरी मोहिम घेवून मतदान जनजागृती कार्यक्रम राबविण्यात आला. स्वाक्षरी मोहिमेत सहभागी झालेल्यांनी सेल्फी पॉईंटवर सेल्फी देखील घेतला. यावेळी स्वीप पथकाचे नोडल अधिकारी, कर्मचारी आदी उपस्थित होते.
हेही वाचा – शिवडी विधानसभा मतदारसंघात भाजपचा मनसेला पाठिंबा
येत्या २० नोव्हेंबर रोजी विधानसभा सार्वत्रिक निवडणुकांसाठी मतदान होणार आहे. त्या अनुषंगाने घरातील सर्व पात्र मतदार असलेले ताई, दादा, आई, बाबा, काका, काकी अशा सर्वांनी मतदान करावे, याविषयी कार्यक्रमाच्या माध्यमातून आवाहन करण्यात आले. यावेळी मतदानाचे महत्व पटवून देण्यात आले.
