वाहतूककोंडी फोडण्यावर असणार भर – डॉ. के. वेंकटेशम
पुणे : अपघात झाल्यानंतर ट्रॅफिकमुळे रुग्णाला वेळेवर रुग्णालयात पोहोचविणे शक्य होत नसल्याची स्थिती सध्या पुण्यात आहे. त्यामुळे अद्ययावत तंत्रज्ञान, अंमलबजावणी व लोकशिक्षण या त्रिसूत्रीच्या आधारे शहरातील वाढती वाहतूककोंडी व अपघातांचे प्रमाण कमी करण्यावर पोलीस प्रशासनाचा भर असेल, असे मत नवनियुक्त पोलीस आयुक्त डॉ. के. वेंकटेशम यांनी व्यक्त केले.
पुणे श्रमिक पत्रकार संघांच्या वतीने आयोजित करण्यात आलेल्या वार्तालापात डॉ. वेंकटेशम यांनी पत्रकारांशी संवाद साधला. गुुन्हे शाखेचे पोलीस उपायुक्त शिरीष सरदेशपांडे उपस्थित होते. डॉ. वेंकटेशम म्हणाले, ‘‘वाहनचालकांना दंड आकारणे, कारवाई करणे हा पोलिसांचा उद्देश नाही; मात्र नागरिकांनीही वाहतुकीबाबत स्वयंशिस्त पाळली पाहिजे. वाहतूक नियमांचे उल्लंघन केल्यानंतर दंड न भरणाऱ्या व्यक्तींची वाहने जमा करण्यात येणार आहेत. तर, पोलिसांना धक्काबुक्की करणाºयांवर गंभीर कारवाई करण्यात येईल. त्यांच्यावर दाखल होणारे खटले जलद गतीने चालविण्यात यावेत, अशी विनंतीदेखील न्यायालयाला करण्यात येणार आहे’’