कारच्या काचा फोडून लॅपटॉप चोरायचे; टोळीचा ‘असा’ केला पर्दाफाश
![मोशीत एसटी बसच्या धडकेने दुचाकीस्वाराचा मृत्यू](https://mahaenews.com/wp-content/uploads/2020/08/police-crime-scene-murder-do-not-cross-shut.jpg)
पिंपरी |महाईन्यूज|
कारच्या काचा फोडून लॅपटॉप चोरी करणाऱ्या आंतरराज्य टोळीला पिंपरी-चिंचवड गुन्हे शाखेच्या युनिट चारने अटक केली. या टोळीकडून लाखो रुपयांचे १८ लॅपटॉप, ३ वायफाय डोंगल, एक कॅमरा लेन्स, ७ लॅपटॉप बॅग, दोन दुचाकी असा एकूण १२ लाख ७७ हजार ६२० रुपये किमतीचा मुद्देमाल जप्त करण्यात आला आहे.
गणेश उर्फ नाना माणिक पवार (रा. नवी मुंबई), बबन काशिनाथ चव्हाण (वय ३९, रा. सोलापूर), बसू जगदीश चव्हाण (४५, रा. हडपसर) अशी अटक केलेल्या आरोपींची नावे आहेत. राजेश चव्हाण (३५, रा. मालाड, मुंबई), मारुती पवार (४०, रा. सोलापूर) हे त्यांचे साथीदार फरारी आहेत. आरोपींनी चोरलेला माल विकत घेणाऱ्यांनाही पोलिसांनी अटक केली आहे. अमोल गुंड (रा. शिवनी, ता. उत्तर सोलापूर, जि. सोलापूर), सुलेमान तांबोळी (रा. विष्णू नगर, कुमठा नाका, सोलापूर) अशी त्यांची नावे आहेत. पोलिस आयुक्त कृष्ण प्रकाश यांनी याबाबत पत्रकार परिषदेत माहिती दिली. या वेळी अतिरिक्त आयुक्त रामनाथ पोकळे, उपायुक्त सुधीर हिरेमठ, सहायक आयुक्त राजाराम पाटील, वरिष्ठ निरीक्षक मोहन शिंदे उपस्थित होते.
हिंजवडी परिसरातून ६ ऑक्टोबरला मिलिंद राळेगावकर (४८, रा. सूस गाव) यांच्या होंडा सिटी कारच्या काचा फोडून चोरट्यांनी ५० हजारांची बॅग चोरून नेली. याबाबत हिंजवडी पोलिस ठाण्यात गुन्हा दाखल करण्यात आला होता. तपासात पोलिस अंमलदार वासुदेव मुंडे आणि आदिनाथ ओंबासे यांनी घटनास्थळावरील सीसीटीव्ही फुटेज तपासले. त्यात एक संशयास्पद दुचाकी पोलिसांना आढळली. पोलिसांनी १०० पेक्षा अधिक सीसीटीव्हीची तपासणी करून दुचाकीचा शोध घेतला. ती दुचाकी आरोपी गणेशची असल्याचे निष्पन्न झाले. गणेश मुंबई पोलिसांच्या रेकोर्डवरील गुन्हेगार आहे. पोलिसांनी त्याला रबाळे, नवी मुंबई परिसरातून ताब्यात घेतले.
गणेशने त्याच्या बबन आणि बसू या दोन साथीदारांची नावे सांगितली. पोलिसांनी दोघांना हडपसर आणि सोलापूर येथून ताब्यात घेतले. त्यांनी त्यांच्या राजेश आणि मारुती या दोन साथीदारांसोबत मिळून पुणे आणि पिंपरी-चिंचवड परिसरात मागील दीड वर्षांपासून २५ ते ३० वाहनांच्या काचा फोडून लॅपटॉप, रोख रक्कम आणि इतर साहित्याची चोरी केल्याची कबुली चौकशीदरम्यान दिली.
चोरी केलेले लॅपटॉप सोलापूर येथील अमोल आणि सुलेमान यांना विकल्याचे सांगितले. चोरीचे काही लॅपटॉप फरारी आरोपी राजेश आणि मारुती यांनी मुंबई येथे विकल्याचे सांगितले. या कारवाईमुळे हिंजवडी पोलिस ठाण्यातील सात, वाकड पोलिस ठाण्यातील तीन, बंडगार्डन पोलिस ठाण्यातील एक आणि हडपसर पोलिस ठाण्यातील दोन असे एकूण १३ गुन्हे उघडकीस आले आहेत. अटक केलेले तिन्ही आरोपी सराईत गुन्हेगार आहेत.
जप्त केलेल्या १८ लॅपटॉप पैकी ६ लॅपटॉपच्या मूळ मालकांचा शोध लागला आहे. १२ लॅपटॉपच्या मूळ मालकांचा पोलिस शोध घेत आहेत. वाहनाची काच फोडून लॅपटॉप चोरीचा प्रकार घडला असल्यास पिंपरी-चिंचवड गुन्हे शाखा ‘युनिट चार’च्या पोलिसांशी संपर्क करण्याचे आवाहन करण्यात आले आहे.