भाजपची नवी खेळी, ज्येष्ठ नेते एकनाथ खडसे ऐवजी कन्या रोहिणी खडसेला उमेदवारी देण्याची तयारी
जळगांव – भाजपचे ज्येष्ठ नेते एकनाथ खडसे यांना विधानसभा निवडणुकीसाठी उमेदवारी देण्यास भाजप नेतृत्त्वाने नकार दिल्याची माहिती समोर आली आहे. मात्र, एकनाथ खडसे यांच्याऐवजी त्यांची कन्या रोहिणी खडसे यांना उमेदवारी देण्याची तयारी भाजपने दर्शविली आहे. भाजपच्या या अनपेक्षित डावामुळे खडसे यांच्यासमोर पेच निर्माण झाला आहे.
भाजपकडून मंगळवारी १२५ उमेदवारांची पहिली यादी जाहीर करण्यात आली होती. मात्र, यामध्ये एकनाथ खडसे यांच्यासह अनेक विद्यमान मंत्र्यांची नावे नसल्यामुळे अनेकांच्या भुवया उंचावल्या होत्या. २०१४ मध्ये राज्यात भाजपची सत्ता आल्यानंतरही एकनाथ खडसे यांना दीर्घकाळ मंत्रिपदापासून दूर राहावे लागले होते. या सगळ्याला मुख्यमंत्री देवेंद्र फडणवीस आणि खडसे यांच्यातील संघर्षाची किनार होती. त्यामुळे आता भाजपकडून एकनाथ खडसे यांचे विधानसभेचे तिकीट कापून त्यांना पूर्णपणे बाजूला सारण्यात येणार का, अशी चर्चा सुरु झाली होती.
दरम्यान, एकनाथ खडसे यांनी उमेदवारी यादीत नाव नसूनही काल मुक्ताईनगर विधानसभा मतदारसंघातून अर्ज भरला होता. आपण भाजपशी एकनिष्ठ असल्यामुळे आपल्याला उमेदवारी नक्की मिळेल, असा विश्वासही त्यांनी व्यक्त केला होता.
