मोहम्मद शमीची कसोटी क्रिकेटमधून निवृत्ती; पोस्ट करत झाला भावूक
Mohammed Shami Retirement From Test | भारताचा प्रमुख वेगवान गोलंदाज मोहम्मद शमीने कसोटी क्रिकेटमधून निवृत्ती जाहीर केली आहे. इन्स्टाग्रामवर एका भावनिक पोस्टद्वारे त्याने क्रिकेटच्या या पारंपरिक प्रकाराला रामराम ठोकल्याचे स्पष्ट केले. “कसोटी क्रिकेटमधून निवृत्त होण्याचा निर्णय घेतला आहे, पण या फॉरमॅटने दिलेल्या आठवणी सदैव माझ्यासोबत राहतील,” अशा शब्दांत त्याने आपल्या भावना व्यक्त केल्या. कसोटीतून निवृत्ती घेतली असली, तरी मर्यादित षटकांच्या क्रिकेटमध्ये भारताचे प्रतिनिधित्व करत राहणे हे आपले सर्वोच्च ध्येय असेल, असेही शमीने स्पष्ट केले आहे.
आपल्या पोस्टमध्ये शमीने लिहिले की, “जेव्हा मी पहिल्यांदा भारताची कसोटी जर्सी परिधान केली होती, तेव्हा देशवासीयांना अभिमान वाटेल अशी कामगिरी करण्याचे एकच स्वप्न होते. तेव्हापासून प्रत्येक विकेट, प्रत्येक संघर्ष, प्रत्येक दुखापत आणि प्रत्येक पुनरागमनाने मला खूप काही शिकवले आहे. कसोटी हा केवळ खेळ नसून माझ्या आयुष्याचा अविभाज्य भाग होता. अत्यंत कठोर अंतःकरणाने मी कसोटी क्रिकेटला अलविदा करत आहे.” या प्रवासात पाठीशी उभे राहणारे कुटुंबीय, सहकारी खेळाडू, प्रशिक्षक आणि चाहत्यांचे आभार मानतानाच, त्याने बंगाल क्रिकेट असोसिएशन आणि बीसीसीआयप्रती कृतज्ञता व्यक्त केली.
हेही वाचा
‘गोकुळ’ दूध संघावर महायुतीचा ताबा मिळवण्याचा मार्ग सुकर; सहकार अध्यादेशावर राज्यपालांची स्वाक्षरी!
पदार्पणाच्याच दिवशी निवृत्ती; ६४ कसोटी आणि २२९ बळींची शानदार कारकीर्द
विशेष म्हणजे शमीने ६ नोव्हेंबर २०१३ रोजी वेस्ट इंडिजविरुद्ध कसोटी पदार्पण केले होते आणि त्याच तारखेचा अनोखा योगायोग साधत त्याने आपल्या कसोटी कारकिर्दीला पूर्णविराम दिला आहे; २०२३ मध्ये भारतासाठी अखेरचा कसोटी सामना खेळणाऱ्या शमीने ६४ कसोटी सामन्यांत २२९ बळी मिळवताना ६ वेळा डावात ५ विकेट्स घेण्याची शानदार कामगिरी आपल्या नावावर नोंदवली आहे.
महाईन्यूज-X वर फॉलो करा : महाईन्यूजला instagram वर फॉलो करा
