लेक लाडकी योजनेचा अर्ज आता महाडीबीटी 2.0 वरून ऑनलाइन; अंगणवाडीत जाण्याची गरज नाही

मुंबई : राज्य सरकारच्या लेक लाडकी योजनेच्या लाभासाठी आता अर्जदारांना महाडीबीटी 2.0 पोर्टलवरून थेट ऑनलाइन अर्ज सादर करता येणार आहे. यापूर्वी या योजनेसाठी अर्ज करण्याकरिता नजीकच्या अंगणवाडी केंद्रात जाऊन अर्ज जमा करावा लागत होता. मात्र, आता अर्ज नोंदणीपासून ते अर्जाची सद्यस्थिती तपासण्यापर्यंतची संपूर्ण प्रक्रिया ऑनलाइन करण्यात आली आहे. महिला व बालविकास मंत्री आदिती तटकरे यांनी ही माहिती दिली.

अंगणवाडीत जाण्याची अट संपली; अर्ज प्रक्रिया ऑनलाइन

यापूर्वी लेक लाडकी योजनेसाठी अर्जदारांना नजीकच्या अंगणवाडी केंद्रात प्रत्यक्ष भेट देऊन अर्ज सादर करावा लागत होता. त्यानंतर हे अर्ज प्रकल्प स्तरावर एकत्रित करून तत्कालीन पोर्टलवर नोंदवले जात होते. पुढे अर्जांची छाननी आणि मंजुरीची प्रक्रिया पूर्ण केली जात होती.

मात्र, आता शासनाच्या विविध योजनांच्या सुसूत्रीकरणाबाबतच्या सूचनांनुसार लेक लाडकी योजनेच्या प्रक्रियेत बदल करण्यात आला आहे. यासाठी नवीन शासन प्रक्रिया पुनर्रचना (GPR) तयार करण्यात आली असून, त्याअंतर्गत अर्जदारांना स्वतः महाडीबीटी 2.0 पोर्टलवरून ऑनलाइन अर्ज करता येणार आहे.

कागदपत्रांची संख्या कमी; अर्जाची स्थितीही ऑनलाइन पाहता येणार

नवीन व्यवस्थेत अर्ज नोंदणी, छाननी, अर्ज मंजुरी आणि लाभ मंजुरी या प्रक्रियांमध्ये सुसूत्रीकरण करण्यात आले आहे. तसेच अर्ज सादर करताना आवश्यक असलेल्या कागदपत्रांची संख्याही कमी करण्यात आली आहे.

अर्जदारांना आता अर्ज सादर केल्यानंतर त्याची सद्यस्थिती ऑनलाइन तपासता येणार आहे. त्यामुळे अर्जाच्या प्रक्रियेबाबत माहिती घेण्यासाठी वारंवार अंगणवाडी केंद्र किंवा संबंधित कार्यालयात जाण्याची गरज कमी होणार आहे.

हेही वाचा –  नालासोपाऱ्यात लिफ्ट कोसळून ७ जण जखमी; आमदार राजन नाईक यांनी घेतली घटनास्थळाची माहिती

अंगणवाडी केंद्र नसलेल्या भागांतील लाभार्थ्यांना दिलासा

ज्या भागांमध्ये अंगणवाडी केंद्र कार्यान्वित नाहीत, अशा ठिकाणच्या लाभार्थ्यांना अर्ज सादर करताना अडचणी येत होत्या. नवीन ऑनलाइन सुविधेमुळे या अडचणी दूर होण्यास मदत होणार आहे. राज्यातील कोणत्याही क्षेत्रातील रहिवाशांना आता या योजनेसाठी ऑनलाइन अर्ज करता येणार असल्याची माहिती देण्यात आली आहे.

आतापर्यंत 2 लाख 98 हजार 695 लाभार्थ्यांना पहिला लाभ

लेक लाडकी योजनेअंतर्गत लाभाची रक्कम थेट लाभ हस्तांतरण (DBT) पद्धतीने लाभार्थ्यांच्या बँक खात्यात जमा करण्याचा निर्णय यापूर्वीच घेण्यात आला होता. आता अर्ज प्रक्रिया ऑनलाइन करण्यात आल्याने योजनेच्या अंमलबजावणीत आणखी एक महत्त्वाचा टप्पा पूर्ण झाला आहे.

सरकारने दिलेल्या माहितीनुसार, लेक लाडकी योजनेअंतर्गत आतापर्यंत 2 लाख 98 हजार 695 लाभार्थ्यांना पहिला लाभ देण्यात आला आहे. ऑनलाइन अर्ज सुविधेमुळे योजनेचा लाभ घेण्याची प्रक्रिया अधिक सुलभ होण्याची अपेक्षा आहे.

महाईन्यूज-X वर फॉलो करा : महाईन्यूजला instagram वर फॉलो करा