रामलीला मैदानावरील काँग्रेसची सभा पुढे ढकला; औषध व्यापाऱ्यांसह १२ बाजार संघटनांची राहुल गांधींकडे मागणी

नवी दिल्ली : दिल्लीतील औषध व्यापाऱ्यांसह १२ विविध बाजार संघटनांनी १ नोव्हेंबर रोजी रामलीला मैदानावर होणाऱ्या काँग्रेसच्या सभेवर प्रश्नचिन्ह उपस्थित केले आहे. ही सभा पुढे ढकलण्यात यावी, अशी मागणी या संघटनांनी लोकसभेतील विरोधी पक्षनेते राहुल गांधी यांच्याकडे पत्राद्वारे केली आहे. राजधानीत सुरू असलेल्या आंदोलनांमुळे आणि सभांमुळे व्यापारी व्यवहारांवर परिणाम होत असून दुकानदार, लहान व्यावसायिक आणि पथविक्रेत्यांचे आर्थिक नुकसान होत असल्याचे संघटनांचे म्हणणे आहे.

दिल्ली ड्रग्स ट्रेडर्स असोसिएशनचे सरचिटणीस आशिष ग्रोव्हर यांनी ३० ऑक्टोबर रोजी राहुल गांधी यांना पत्र लिहून १ नोव्हेंबरच्या सभेच्या निर्णयाचा पुनर्विचार करण्याची विनंती केली. दिल्लीत सुरू असलेल्या आंदोलने, निदर्शने आणि मोर्च्यांमुळे व्यापारी, दुकानदार, पथविक्रेते तसेच लहान व्यवसायांच्या दैनंदिन कामकाजात अडथळे निर्माण होत असल्याचे त्यांनी पत्रात नमूद केले.

मॉक पार्लमेंट कार्यक्रमही पुढे ढकलला

संघटनेच्या म्हणण्यानुसार, अपरिहार्य परिस्थितीमुळे ३० ऑक्टोबर रोजी नियोजित असलेला मॉक पार्लमेंट कार्यक्रमही पुढे ढकलावा लागला. त्यामुळे ज्या प्रकारे हा कार्यक्रम पुढे ढकलण्यात आला, त्याचप्रमाणे रामलीला मैदानावरील काँग्रेसची रॅलीदेखील पुढे ढकलण्याचा विचार करावा, अशी मागणी व्यापारी संघटनांनी केली आहे.

हेही वाचा –  महानगरपालिकेच्या कारभारात पारदर्शकता आणा आणि खर्चात बचत करा – स्थायी समिती सभापती अभिषेक बारणे यांचे निर्देश

सणासुदीच्या आणि लग्नसराईच्या हंगामाची चिंता

आगामी सणासुदीचा आणि लग्नसराईचा हंगाम लक्षात घेता व्यापारी संघटनांनी चिंता व्यक्त केली आहे. या काळात बाजारपेठांमधील व्यवहारांना विशेष महत्त्व असते. अशा वेळी व्यावसायिक घडामोडींवर निर्बंध आले किंवा आंदोलनांमुळे कामकाजात व्यत्यय निर्माण झाला, तर दिल्लीतील व्यापार, रोजगार आणि सामान्य जनजीवनावर परिणाम होऊ शकतो, असे संघटनांचे म्हणणे आहे.

सध्या सुरू असलेल्या आंदोलनांच्या पार्श्वभूमीवर सामान्य व्यापारी व्यवहार सुरळीत सुरू राहणे आवश्यक असल्याचेही पत्रात नमूद करण्यात आले आहे. विशेषतः लहान दुकानदार आणि पथविक्रेत्यांच्या उपजीविकेवर परिणाम होऊ नये, यासाठी राहुल गांधी यांनी व्यापाऱ्यांच्या मागणीचा विचार करून सभा पुढे ढकलावी, अशी अपेक्षा संघटनांनी व्यक्त केली आहे.

१२ बाजार संघटनांचे संयुक्त आवाहन

या मागणीला दिल्लीतील १२ बाजार संघटनांचा पाठिंबा असल्याचे सांगण्यात आले आहे. चांदनी चौक ट्रेडर्स कौन्सिल, डाळी आणि कडधान्ये आयातदार संघटना, कापड बाजार व्यापार समिती, दिल्ली ड्रग्स ट्रेडर्स असोसिएशन आणि न्यू कृष्णा कापड बाजार व्यापारी संघटना यांसह विविध संघटनांनी राहुल गांधी यांना पत्र लिहिले आहे.

आंदोलनांमुळे व्यापारी वर्गाला होणाऱ्या अडचणी लक्षात घेऊन १ नोव्हेंबर रोजी रामलीला मैदानावर होणारी काँग्रेसची सभा पुढे ढकलण्याबाबत निर्णय घ्यावा, असे आवाहन या संघटनांनी केले आहे.

महाईन्यूज-X वर फॉलो करा : महाईन्यूजला instagram वर फॉलो करा