सीजेपी नेत्यांच्या अडचणी वाढल्या; दिल्ली पोलिसांच्या चौकशीला वेळ मागितला, नव्या नोटिशीची शक्यता

नवी दिल्ली : कॉकरोच जनता पार्टी (CJP) चे सहसंयोजक सौरव दास आणि आशुतोष रांका यांची तिहार तुरुंगातून सुटका झाल्यानंतरही त्यांच्याशी संबंधित कायदेशीर प्रक्रिया सुरूच आहे. दिल्ली पोलिसांच्या क्राइम ब्रँचने चौकशीसाठी दोघांना राजौरी गार्डन येथील कार्यालयात बोलावले होते. मात्र, दोघांनी चौकशीसाठी उपस्थित राहण्यास अधिक वेळ मागितला. त्यामुळे दिल्ली पोलिसांकडून त्यांना नव्याने नोटीस पाठवली जाण्याची शक्यता आहे.

५० हजार रुपयांच्या बॉन्डवर सुटका

विशेष कार्यकारी दंडाधिकारी न्यायालयाने सौरव दास आणि आशुतोष रांका यांची न्यायालयीन कोठडीतून सुटका करण्याचे आदेश देताना प्रत्येकी ५० हजार रुपयांचे वैयक्तिक आणि जामीनदार बॉन्ड सादर करण्याचे निर्देश दिले. तसेच चौकशीच्या प्रत्येक सुनावणीला उपस्थित राहणे, शांतता व सार्वजनिक सुव्यवस्था राखणे आणि बॉन्डमधील अटींचे पालन करणे बंधनकारक केले आहे.

दोघांनी दिलेल्या लेखी हमीमध्ये कायद्याचे पालन करण्यासह जंतरमंतर येथे अधिकृत अधिसूचनेनुसार आंदोलनस्थळाचा दर्जा पुन्हा निश्चित होईपर्यंत आंदोलनाचे आवाहन न करण्याचे आश्वासन दिले आहे. भविष्यातील आंदोलने संविधानाच्या चौकटीत राहून केली जातील, अशीही हमी देण्यात आली आहे.

हेही वाचा –  जलप्रकल्पांना आर्थिकदृष्ट्या सक्षम करण्यासाठी सौरऊर्जा, बॅटरी साठवणुकीवर भर; फडणवीसांचे निर्देश

१३ ऑक्टोबरच्या आंदोलनामुळे कारवाई

दिल्लीतील जंतरमंतर येथे १३ ऑक्टोबर रोजी आंदोलन करण्याच्या प्रयत्नावरून सीजेपीच्या नेत्यांवर कारवाई करण्यात आली होती. पोलिसांच्या म्हणण्यानुसार, जंतरमंतरवरील संबंधित जागा अधिसूचित आंदोलनस्थळ नसतानाही आंदोलनकर्त्यांनी तेथे प्रवेश करण्याचा प्रयत्न केला. या प्रकरणात सौरव दास, आशुतोष रांका आणि अन्य कार्यकर्त्यांची नावे समोर आली होती.

या घटनेनंतर दास आणि रांका यांना न्यायालयीन कोठडीत पाठवण्यात आले होते. त्यांच्या कोठडीत मुदतवाढ देण्याबाबत सुनावणी झाल्यानंतर न्यायालयाने पुढील कोठडी आवश्यक नसल्याचे मानून अटींसह सुटकेचे आदेश दिले.

पुढील सुनावणीकडे लक्ष

दिल्ली पोलिसांच्या क्राइम ब्रँचने चौकशीसाठी बोलावले असता दोघांनी अधिक वेळ मागितल्याचे वृत्त आहे. त्यामुळे पोलिसांकडून पुढील नोटीस बजावली जाऊ शकते. या प्रकरणाची पुढील सुनावणी २३ ऑक्टोबर रोजी होणार असून, दोन्ही नेत्यांना आणि त्यांच्या जामीनदारांना उपस्थित राहण्याचे निर्देश देण्यात आले आहेत.

दरम्यान, सीजेपीचे प्रमुख अभिजीत दिपके यांनी दिवाळी कुटुंबासोबत साजरी करण्याचे आवाहन केल्याचे वृत्त आहे. आता दिवाळीनंतर पक्ष आंदोलनाबाबत कोणती भूमिका घेतो आणि सुरू असलेल्या चौकशीला कसा प्रतिसाद देतो, याकडे लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा