महाराष्ट्रात २७ डिसेंबर ‘कृषी विद्यार्थी दिन’ म्हणून साजरा होणार; कृषीमंत्री दत्तात्रय भरणे यांची घोषणा

मुंबई : देशाचे पहिले केंद्रीय कृषीमंत्री डॉ. पंजाबराव ऊर्फ भाऊसाहेब देशमुख यांच्या जयंतीनिमित्त २७ डिसेंबर हा दिवस महाराष्ट्रात ‘राज्य अॅग्रीकॉस – कृषी विद्यार्थी दिन’ म्हणून साजरा करण्यात येणार आहे. राज्याचे कृषीमंत्री दत्तात्रय भरणे यांनी याबाबत घोषणा केली असून, महाराष्ट्र शासनाच्या कृषी विभागाने २२ ऑक्टोबर २०२६ रोजी यासंदर्भातील शासन निर्णय जारी केला आहे. या निर्णयामुळे राज्यातील कृषी विद्यार्थ्यांच्या अनेक वर्षांच्या मागणीला अखेर यश आले आहे.

कृषी विद्यार्थ्यांच्या मागणीला यश

डॉ. पंजाबराव देशमुख यांच्या जयंतीनिमित्त २७ डिसेंबर हा दिवस कृषी विद्यार्थी दिन म्हणून साजरा करण्यात यावा, अशी राज्यातील अॅग्रीकॉस विद्यार्थ्यांची अनेक वर्षांपासूनची मागणी होती. शासनाच्या निर्णयामुळे कृषी शिक्षण घेणारे विद्यार्थी, कृषी पदवीधर, संशोधक आणि युवकांना प्रोत्साहन मिळणार आहे.

कृषीमंत्री दत्तात्रय भरणे म्हणाले, “डॉ. पंजाबराव देशमुख यांचे कृषी शिक्षण, संशोधन आणि शेतकरी हितासाठीचे योगदान अतुलनीय आहे. त्यांच्या जयंतीनिमित्त २७ डिसेंबर हा दिवस ‘राज्य अॅग्रीकॉस – कृषी विद्यार्थी दिन’ म्हणून घोषित करण्याचा निर्णय कृषी क्षेत्रातील विद्यार्थी, संशोधक आणि युवकांना प्रेरणा देणारा ठरेल. या माध्यमातून कृषी शिक्षण आणि संशोधनातील योगदानाचा गौरव होईल.”

हेही वाचा –  विधान परिषद निवडणुकीत महाविकास आघाडीत बंडखोरीचे ग्रहण; नितेश कराळे यांची पक्षातून हकालपट्टी, पाच जागांवर चुरस

डॉ. पंजाबराव देशमुख यांचे कृषी क्षेत्रातील योगदान

डॉ. पंजाबराव ऊर्फ भाऊसाहेब देशमुख हे स्वतंत्र भारताचे पहिले केंद्रीय कृषीमंत्री होते. कृषी शिक्षण, संशोधन आणि शेतकरी संघटनांच्या माध्यमातून त्यांनी देशाच्या कृषी विकासात महत्त्वपूर्ण योगदान दिले.

देशात कृषी विद्यापीठांची संकल्पना पुढे नेणे, भारतीय कृषी अनुसंधान परिषदेच्या पुनर्गठनासाठी योगदान देणे आणि १९५५ मध्ये ‘भारत कृषक समाज’ या संस्थेची स्थापना करणे, ही त्यांच्या कार्यातील महत्त्वाची वैशिष्ट्ये आहेत. त्यांच्या कार्याचा गौरव करण्यासोबतच नव्या पिढीतील कृषी विद्यार्थ्यांना त्यांच्या विचारांतून प्रेरणा मिळावी, हा या उपक्रमाचा उद्देश आहे.

आधुनिक शेतीसाठी विद्यार्थ्यांना प्रोत्साहन

आज शेतीसमोर हवामान बदल, पाणीटंचाई, उत्पादन खर्च आणि बाजारपेठेतील चढ-उतार अशी अनेक आव्हाने आहेत. या परिस्थितीत कृषी शिक्षण घेणाऱ्या विद्यार्थ्यांनी आधुनिक तंत्रज्ञान, संशोधन आणि नावीन्यपूर्ण प्रयोगांच्या माध्यमातून शेती अधिक सक्षम करण्यासाठी पुढाकार घेणे आवश्यक आहे.

‘राज्य अॅग्रीकॉस – कृषी विद्यार्थी दिन’ या उपक्रमामुळे कृषी विद्यार्थ्यांच्या ज्ञानाचा आणि संशोधनाचा उपयोग शेतीच्या विकासासाठी करण्यास प्रोत्साहन मिळेल. तसेच कृषी क्षेत्रात नव्या संकल्पना राबवणाऱ्या विद्यार्थ्यांना आणि युवकांना आपले योगदान अधोरेखित करण्यासाठी एक व्यासपीठ उपलब्ध होईल, अशी अपेक्षा कृषीमंत्री दत्तात्रय भरणे यांनी व्यक्त केली.

महाईन्यूज-X वर फॉलो करा : महाईन्यूजला instagram वर फॉलो करा