मुंबईतील मोठ्या प्रकल्पांना वेग; गोरेगाव-मुलुंड जोडरस्ता, किनारी मार्ग, गारगाई धरण मे २०२९ पूर्वी पूर्ण करण्याचे लक्ष्य

मुंबई : मुंबईतील पायाभूत सुविधांना गती देण्यासाठी महापालिका प्रशासनाने महत्त्वाच्या प्रकल्पांच्या कामांना वेग देण्यावर भर दिला आहे. गोरेगाव-मुलुंड जोडरस्ता, वर्सोवा-दहिसर-भाईंदर किनारी मार्ग आणि गारगाई धरण प्रकल्प मे २०२९ पूर्वी पूर्ण करण्याचे लक्ष्य ठेवण्यात आले आहे. आगामी लोकसभा आणि विधानसभा निवडणुकांच्या पार्श्वभूमीवर या प्रकल्पांचे काम वेळेत पूर्ण करण्यासाठी प्रशासकीय पातळीवर नियोजन सुरू असल्याचे चित्र आहे.

मुंबई महापालिकेने चालू आर्थिक वर्षासाठी सुमारे ८० हजार कोटी रुपयांचा अर्थसंकल्प मांडला असून, त्यातील ४८ हजार कोटी रुपयांची तरतूद भांडवली खर्चासाठी करण्यात आली आहे. रस्त्यांचे काँक्रीटीकरण, वाहतूक कोंडी कमी करणे, पाणीपुरवठा सुधारणे आणि सांडपाण्यावर प्रक्रिया करणे यांसारख्या कामांसाठी निधीची तरतूद करण्यात आली आहे.

गोरेगाव-मुलुंड जोडरस्त्यामुळे पूर्व-पश्चिम संपर्क मजबूत

गोरेगाव-मुलुंड जोडरस्ता हा मुंबईतील महत्त्वाच्या पायाभूत सुविधा प्रकल्पांपैकी एक आहे. हा प्रकल्प पूर्ण झाल्यानंतर पश्चिम द्रुतगती महामार्ग आणि पूर्व द्रुतगती महामार्ग यांच्यात थेट संपर्क निर्माण होणार आहे. त्यामुळे पूर्व आणि पश्चिम उपनगरांदरम्यानचा प्रवास अधिक सुलभ होण्यास मदत होईल. वाहतूक कोंडी कमी करण्याच्या दृष्टीनेही या प्रकल्पाला महत्त्व आहे.

वर्सोवा-दहिसर-भाईंदर किनारी मार्गाला गती

मुंबई महापालिकेतर्फे वर्सोवा-दहिसर किनारी मार्ग उभारण्यात येत आहे. हा मार्ग पुढे भाईंदर उन्नत मार्गाशी जोडला जाणार आहे. प्रकल्प पूर्ण झाल्यानंतर दक्षिण मुंबईतील नरिमन पॉइंटपासून दहिसर आणि भाईंदरपर्यंत किनारी मार्गाने प्रवास करणे शक्य होणार आहे.

मुख्यमंत्री देवेंद्र फडणवीस यांनी जून महिन्यात या प्रकल्पाची पाहणी केली होती. प्रकल्प वेळेत पूर्ण करण्यासाठी आवश्यक परवानग्या आणि प्रशासकीय प्रक्रिया मार्गी लावण्यावर भर दिला जात आहे.

रस्ते काँक्रीटीकरणाची कामे २०२९ पूर्वी पूर्ण करण्याचे नियोजन

मुंबईतील रस्त्यांच्या काँक्रीटीकरणासाठी महापालिकेने दोन टप्प्यांत मोठ्या निविदा काढल्या होत्या. पहिल्या दोन टप्प्यांतील कामे २०२७ पर्यंत पूर्ण करण्याचे नियोजन आहे, तर उर्वरित कामे २०२९ पूर्वी पूर्ण करण्याचे लक्ष्य ठेवण्यात आले आहे. या कामांमुळे रस्त्यांची गुणवत्ता सुधारण्याबरोबरच देखभाल आणि दुरुस्तीवरील खर्च कमी होण्याची अपेक्षा आहे.

हेही वाचा –  महाराष्ट्र भूषण पुरस्कार निवड समितीची पुनर्रचना; रघुनाथ माशेलकर, अशोक सराफ, अंजली भागवत यांचा समावेश

गारगाई धरणातून पाणीपुरवठ्याला बळ

मुंबईची वाढती पाण्याची गरज पूर्ण करण्यासाठी गारगाई धरण प्रकल्पाला वेग देण्यात येत आहे. गेल्या दोन दशकांपासून प्रलंबित असलेला हा प्रकल्प मे २०२९ पर्यंत पूर्ण करण्याचे नियोजन आहे. त्याच वर्षी धरणात पाणीसाठा करण्याचे उद्दिष्ट ठेवण्यात आले आहे.

याशिवाय निक्षारीकरण प्रकल्प आणि सांडपाणी पुनर्प्रक्रिया प्रकल्पांनाही महापालिकेच्या विकास आराखड्यात महत्त्व देण्यात आले आहे. या प्रकल्पांमुळे भविष्यातील पाणीपुरवठ्याचे नियोजन आणि उपलब्ध जलस्रोतांचा प्रभावी वापर करण्यास मदत होऊ शकते.

‘प्रकल्प वेळेत पूर्ण झाले पाहिजेत’

महापालिकेच्या प्रकल्पांच्या वेळापत्रकाबाबत सभागृह नेते गणेश खणकर यांनी प्रशासनाने निश्चित केलेल्या मुदतीत कामे पूर्ण करण्यावर भर दिला.

“प्रकल्पाचे वेळापत्रक प्रशासनाने ठरवलेले आहे. ते वेळेत पूर्ण झाले पाहिजे, यावर भर आहे. आमचे सरकार हे स्थगिती सरकार नाही,” असे खणकर यांनी सांगितले.

एकूणच, मुंबईतील वाहतूक, रस्ते आणि पाणीपुरवठ्याशी संबंधित मोठे प्रकल्प निर्धारित मुदतीत पूर्ण करण्याचे महापालिका प्रशासनापुढे आव्हान आहे. या प्रकल्पांची प्रत्यक्ष प्रगती आणि निर्धारित वेळेत होणारी पूर्तता यावर मुंबईच्या पायाभूत सुविधांच्या विकासाची दिशा अवलंबून राहणार आहे.

महाईन्यूज-X वर फॉलो करा : महाईन्यूजला instagram वर फॉलो करा