टायगर श्रॉफवरील हल्ल्यानंतर फडणवीसांचा इशारा; ‘मुंबई पोलिसांना कोणी उघडपणे चॅलेंज देऊ शकत नाही’

मुंबई : बॉलिवूड अभिनेता टायगर श्रॉफ याच्यावर झालेल्या गोळीबाराच्या घटनेनंतर मुख्यमंत्री देवेंद्र फडणवीस यांनी आरोपींवर कठोर कारवाई करण्याचा इशारा दिला आहे. मुंबई पोलिसांनी आरोपींचे धागेदोरे शोधून काढले असून, अशा प्रकारच्या घटना सहन केल्या जाणार नाहीत, असे फडणवीस यांनी स्पष्ट केले. राज्यातून तसेच राज्याबाहेरून आणि देशाबाहेरून कार्यरत असलेल्या गुन्हेगारी टोळ्यांवर कारवाई केली जाईल, असेही त्यांनी सांगितले.

‘मुंबई पोलिसांना कोणी उघडपणे चॅलेंज देऊ शकत नाही’

टायगर श्रॉफवरील हल्ल्याबाबत बोलताना मुख्यमंत्री फडणवीस म्हणाले, “अशा प्रकारच्या घटना सहन केल्या जाणार नाहीत. मुंबई पोलीस निश्चितपणे आरोपींना शोधून काढतील. पोलिसांना उघडपणे कोणी चॅलेंज देऊ शकत नाही.”

गुन्हेगारी टोळ्या धमक्यांसाठी संवाद माध्यमांचा वापर करतात; मात्र त्यांच्या धमक्यांना घाबरण्याची गरज नाही, असेही त्यांनी सांगितले. प्रत्येक धमकी पोलिसांकडून गांभीर्याने घेतली जात असल्याचे फडणवीस यांनी स्पष्ट केले.

राज्याबाहेरून कार्यरत टोळ्यांवरही कारवाई

काही गुन्हेगारी टोळ्या महाराष्ट्राबाहेरून तसेच देशाबाहेरून कार्यरत असल्याने तपासात आव्हाने निर्माण होतात, असे मुख्यमंत्र्यांनी नमूद केले. अशा टोळ्यांविरोधात कारवाई करण्यासाठी मुंबई पोलीस केंद्र सरकारच्या संबंधित यंत्रणांशी समन्वय साधतील, असे त्यांनी सांगितले.

“महाराष्ट्रातून जे ऑपरेट करतात, त्यांना अटक केली आहे. जे राज्याबाहेरून आणि देशाबाहेरून ऑपरेट करतात, त्यांनाही शोधून काढू. त्यांच्यावर कारवाई होईल,” असे फडणवीस म्हणाले.

हेही वाचा –  गुणवत्ता संकल्पनावरील विभागीय ४१ वे वार्षिक अधिवेशन २०२६ चे उत्साहात आयोजन; १०० हून अधिक संस्थांतील १३०० हून अधिक स्पर्धकांचा सहभाग

टायगर श्रॉफच्या सुरक्षेबाबत मुख्यमंत्र्यांची माहिती

टायगर श्रॉफवरील हल्ल्याची घटना गंभीर असल्याचे सांगत, या प्रकरणात आवश्यक ती सर्व पावले उचलली जातील, असे मुख्यमंत्र्यांनी स्पष्ट केले. टायगर श्रॉफ यांना सुरक्षा उपलब्ध होती; मात्र काही कारणाने त्यांनी ती त्या वेळी सोबत ठेवली नव्हती. त्यावेळी त्यांच्यासोबत सुरक्षा कवच नव्हते, अशी माहिती फडणवीस यांनी दिली.

हल्ल्यातील आरोपींचे धागेदोरे पोलिसांनी ओळखल्याचेही त्यांनी सांगितले. या प्रकरणात राज्यातून कार्यरत असलेल्या काही व्यक्तींना अटक करण्यात आल्याचा दावा त्यांनी केला असून, राज्याबाहेरून आणि देशाबाहेरून कार्यरत असलेल्या संबंधित व्यक्तींवरही कारवाई केली जाईल, असे स्पष्ट केले.

‘गुन्हेगारांना मुंबई पोलीस जेरबंद करतील’

मुंबई पोलीस ही व्यावसायिक आणि सक्षम यंत्रणा असल्याचे नमूद करत, गुन्हेगारांना जेरबंद करण्यासाठी पोलीस कटिबद्ध असल्याचे मुख्यमंत्री म्हणाले. “कोणीही घाबरण्याचे कारण नाही. हल्ला करणारे डरपोक लोक आहेत. त्यांचा वार नाकाम केला जाईल,” असेही त्यांनी सांगितले.

टायगर श्रॉफवरील गोळीबार प्रकरणाचा तपास सुरू असून, आरोपींचे नेटवर्क, हल्ल्यामागील कारण आणि संबंधित व्यक्तींची भूमिका याबाबत पुढील तपासातून अधिक माहिती समोर येण्याची अपेक्षा आहे.

महाईन्यूज-X वर फॉलो करा : महाईन्यूजला instagram वर फॉलो करा