एकनाथ शिंदेंच्या शिवसेनेत मोठ्या फेरबदलांचे संकेत! दसऱ्यानंतर मंत्रिमंडळात खांदेपालटाची शक्यता

मुंबई : उपमुख्यमंत्री एकनाथ शिंदे यांच्या नेतृत्वाखालील शिवसेनेत संघटनात्मक आणि मंत्रिमंडळ स्तरावर मोठे फेरबदल होण्याची शक्यता व्यक्त केली जात आहे. काही मंत्र्यांच्या कामगिरीवर शिंदे नाराज असल्याची चर्चा असून, कामाचा आढावा घेतल्यानंतर काही मंत्र्यांना मंत्रिमंडळातून वगळले जाऊ शकते, अशी माहिती सूत्रांच्या हवाल्याने समोर आली आहे. त्यांच्या जागी तरुण आणि कार्यक्षम आमदारांना संधी देण्याबरोबरच काही राज्यमंत्र्यांना कॅबिनेट मंत्रिपदी बढती मिळण्याची शक्यता वर्तवली जात आहे.

दसरा मेळाव्यानंतर हालचालींना वेग?

दसरा मेळावा पार पडल्यानंतर मंत्रिमंडळातील संभाव्य बदलांच्या हालचालींना वेग येऊ शकतो, अशी चर्चा राजकीय वर्तुळात आहे. आगामी हिवाळी अधिवेशनाच्या पार्श्वभूमीवर मंत्र्यांच्या कामगिरीचा आढावा घेऊन निर्णय घेतले जाण्याची शक्यता आहे. मात्र, फेरबदलाची तारीख किंवा मंत्रिपदावरून वगळल्या जाणाऱ्या नेत्यांची नावे याबाबत अधिकृत घोषणा झालेली नाही.

हेही वाचा –  ‘सत्तांतराची स्वप्ने ठराविक राज्यांतच का?’ संजय राऊतांवर भाजप प्रवक्ते नवनाथ बन यांचा पलटवार

तरुण आमदारांना संधी मिळणार?

शिवसेनेत नव्या नेतृत्वाला संधी देणे आणि पक्षाच्या संघटनात्मक कामाला गती देणे, हा संभाव्य फेरबदलामागील उद्देश असल्याचे सांगितले जात आहे. काही मंत्र्यांच्या कामगिरीबाबत समाधान नसल्यास त्यांना पदावरून दूर करून नव्या चेहऱ्यांना संधी दिली जाऊ शकते. त्याचबरोबर राज्यमंत्री म्हणून काम करणाऱ्या काही नेत्यांना कॅबिनेट मंत्रिपदी बढती देण्याचाही पर्याय विचाराधीन असल्याची चर्चा आहे.

मंत्र्यांच्या कामगिरीचा आढावा महत्त्वाचा

सरकारच्या कार्यकाळातील आतापर्यंतच्या कामगिरीचा आढावा घेऊन प्रशासकीय कार्यक्षमता वाढवण्याच्या दृष्टीने बदल केले जाऊ शकतात. मंत्र्यांच्या कामाचा वेग, खात्यांमधील कामकाज आणि पक्षसंघटनेतील योगदान यांसारख्या बाबींचा विचार होण्याची शक्यता आहे.

दरम्यान, मंत्रिमंडळातील फेरबदलाबाबतच्या चर्चांना अद्याप अधिकृत दुजोरा मिळालेला नाही. त्यामुळे कोणाला मंत्रिपद मिळणार किंवा कोणाला वगळले जाणार, हे स्पष्ट होण्यासाठी अधिकृत निर्णयाची प्रतीक्षा करावी लागणार आहे.

महाईन्यूज-X वर फॉलो करा : महाईन्यूजला instagram वर फॉलो करा