‘काँग्रेसची डबल ढोलकी!’; SIR वरून फडणवीसांचा राहुल गांधींना टोला, कपिल सिब्बलांचा जुना व्हिडिओ केला पोस्ट

मुंबई : मतदार याद्यांच्या विशेष सखोल पुनरावलोकनाच्या (SIR) प्रक्रियेवरून काँग्रेस आणि इंडिया आघाडीने केंद्र सरकार तसेच निवडणूक आयोगाविरोधात आंदोलन तीव्र केले असताना मुख्यमंत्री देवेंद्र फडणवीस यांनी काँग्रेसवर निशाणा साधला आहे. ‘काँग्रेसची डबल ढोलकी!’ असे म्हणत त्यांनी सोशल मीडिया प्लॅटफॉर्म ‘एक्स’वर काँग्रेसचे नेते आणि तत्कालीन केंद्रीय कायदेमंत्री कपिल सिब्बल यांचा संसदेतील भाषणाचा व्हिडिओ पोस्ट केला. या पोस्टमधून त्यांनी काँग्रेसच्या सध्याच्या भूमिकेवर प्रश्न उपस्थित केला आहे.

गेल्या काही दिवसांपासून SIR प्रक्रिया रद्द करावी आणि मुख्य निवडणूक आयुक्त ज्ञानेश कुमार यांनी राजीनामा द्यावा, या मागण्यांसाठी काँग्रेस आणि इंडिया आघाडीचे नेते दिल्लीत आंदोलन करत आहेत. निवडणूक आयोगाच्या मुख्यालयावर मोर्चा काढण्यासह विविध ठिकाणी आंदोलने करण्यात आली. मतदार याद्यांमधील कथित अनियमिततेवरून विरोधकांनी निवडणूक आयोगावर टीका केली आहे.

या पार्श्वभूमीवर फडणवीस यांनी कपिल सिब्बल यांच्या संसदेतील जुन्या वक्तव्याचा संदर्भ देत काँग्रेसच्या भूमिकेवर आक्षेप घेतला. आपल्या पोस्टमध्ये त्यांनी काँग्रेसवर SIR विरोधात जनमत भडकवण्याचा प्रयत्न केल्याचा आरोप केला.

हेही वाचा –  विधान परिषद निवडणुकीत आज माघारीचा शेवटचा दिवस; पुणे शिक्षक मतदारसंघात भाजप-शिंदे सेनेच्या भूमिकेकडे लक्ष

‘काँग्रेस प्रत्येक व्यासपीठावरून SIR विरोधात जनमत भडकवण्याचा प्रयत्न करत आहे. पण त्याआधी त्यांनी त्यांच्या सत्ताकाळातील तत्कालीन कायदेमंत्री कपिल सिब्बल यांचे संसदेतील अधिकृत रेकॉर्डवरील वक्तव्य ऐकायला हवे. त्यावेळी सिब्बल SIRच्या समर्थनार्थ बोलले होते. काँग्रेसच्या राजकारणाचे रंग बदलले, पण संसदेतील रेकॉर्ड बदलत नाहीत. आपणही ऐका आणि ठरवा कोण खरं आणि कोण खोटं?’ अशा आशयाचा टोला फडणवीस यांनी पोस्टमधून लगावला.

SIR वरून राजकीय संघर्ष तीव्र

SIR प्रक्रियेच्या उद्देशावरून आणि अंमलबजावणीवरून सत्ताधारी व विरोधकांमध्ये आरोप-प्रत्यारोप सुरू आहेत. विरोधकांनी मतदार याद्यांच्या पारदर्शकतेचा प्रश्न उपस्थित केला आहे, तर फडणवीस यांनी काँग्रेसच्या भूमिकेतील कथित विसंगतीकडे लक्ष वेधण्याचा प्रयत्न केला आहे.

कपिल सिब्बल यांच्या जुन्या संसदीय वक्तव्याचा दाखला देत फडणवीस यांनी काँग्रेसला कोंडीत पकडण्याचा प्रयत्न केला असला, तरी त्या वक्तव्याचा नेमका संदर्भ आणि सध्याच्या SIR प्रक्रियेशी त्याचा संबंध समजून घेण्यासाठी संबंधित संसदीय नोंदींची पडताळणी महत्त्वाची ठरणार आहे.

महाईन्यूज-X वर फॉलो करा : महाईन्यूजला instagram वर फॉलो करा