नवी दिल्ली : मुख्य निवडणूक आयुक्त ज्ञानेश कुमार यांच्या विरोधातील आंदोलनावरून इंडिया आघाडी आणि केंद्र सरकार यांच्यातील राजकीय संघर्ष अधिक तीव्र झाला आहे. मंगळवारी दिल्लीमध्ये निवडणूक आयोगाच्या कार्यालयाकडे मोर्चा काढण्याचा प्रयत्न करण्यात आला. पोलिसांनी मोर्चा अडवल्यानंतर राहुल गांधी, प्रियंका गांधी वाड्रा यांच्यासह विरोधी नेत्यांनी आकाशवाणी भवन परिसरात ठिय्या आंदोलन केले. सुमारे आठ ते नऊ तासांच्या आंदोलनानंतर पोलिसांनी त्यांना ताब्यात घेतले.
या कारवाईनंतरही इंडिया आघाडीने आंदोलन मागे घेतलेले नाही. काँग्रेस अध्यक्ष मल्लिकार्जुन खरगे यांच्या जनपथ येथील निवासस्थानी विरोधी पक्षांच्या प्रमुख नेत्यांची बैठक झाली. त्यानंतर निवडणूक आयोगाच्या कार्यालयाकडे पुन्हा मोर्चा काढण्याच्या भूमिकेवर चर्चा झाल्याचे वृत्त आहे.
आंदोलनादरम्यान राहुल गांधी यांनी निवडणूक प्रक्रियेतील कथित अनियमितता आणि मतदार यादीच्या विशेष सखोल पुनरावलोकनावरून निवडणूक आयोगावर प्रश्न उपस्थित केले. ‘ज्ञानेश कुमार यांना राजीनामा द्यावाच लागेल,’ अशी मागणी त्यांनी केली. विरोधकांनी निवडणूक आयोगाच्या कामकाजावर आणि मतदार यादीतील बदलांवर गंभीर आरोप केले आहेत; मात्र निवडणूक आयोगाने या आरोपांना नकार दिला आहे.
मल्लिकार्जुन खरगे यांनी विरोधकांचा हा लढा देशातील लोकशाही आणि मताधिकाराच्या संरक्षणासाठी असल्याचे सांगितले. त्यांच्या म्हणण्यानुसार, सरकारच्या भूमिकेमुळे निवडणूक प्रक्रियेबाबत प्रश्न निर्माण झाले आहेत. त्यांनी मुख्य निवडणूक आयुक्तांवरही गंभीर आरोप केले.
हेही वाचा – ‘लाडकी बहीण योजना कधीच बंद होणार नाही’; एकनाथ शिंदेंची मोठी घोषणा, लाभार्थी महिलांना दिलासा
या बैठकीला काँग्रेसचे सरचिटणीस के. सी. वेणुगोपाल, तृणमूल काँग्रेसचे डेरेक ओब्रायन, राजदचे मनोज झा, माकपचे जॉन ब्रिटास यांच्यासह इंडिया आघाडीतील विविध पक्षांचे नेते उपस्थित होते.
काँग्रेस नेते पवन खेडा यांनीही आंदोलनावरून आक्रमक भूमिका घेतली. पोलिसांकडून दाखल होणाऱ्या FIR ला काँग्रेस घाबरत नसल्याचे त्यांनी म्हटले. ज्ञानेश कुमार यांच्याविरोधातील आंदोलन पुढेही सुरू राहणार असल्याचे संकेत त्यांनी दिले.
दरम्यान, मंगळवारच्या आंदोलनादरम्यान राहुल गांधी आणि प्रियंका गांधी यांनी पोलिसांचे बॅरिकेड ओलांडून आकाशवाणी भवन परिसरात प्रवेश केला. त्यानंतर तेथे ठिय्या आंदोलन सुरू झाले. पोलिसांनी त्यांना ताब्यात घेतल्यानंतर रात्री उशिरा त्यांची सुटका करण्यात आली. या प्रकरणी आंदोलनाशी संबंधित अनेक FIR दाखल झाल्याचेही वृत्त आहे.
मतदार यादीच्या Special Intensive Revision (SIR) प्रक्रियेवरून इंडिया आघाडी आणि निवडणूक आयोग यांच्यातील वाद सुरू आहे. विरोधी पक्षांनी SIR प्रक्रियेवर प्रश्न उपस्थित करत ज्ञानेश कुमार यांच्या राजीनाम्याची मागणी केली आहे. दुसरीकडे, निवडणूक आयोगाकडून मतदार याद्यांच्या शुद्धीकरणासाठी ही प्रक्रिया आवश्यक असल्याचे सांगण्यात आले आहे.
त्यामुळे दिल्लीतील आंदोलनानंतर आता इंडिया आघाडी पुढील भूमिका काय घेणार आणि निवडणूक आयोगाकडे पुन्हा मोर्चा काढणार का, याकडे राजकीय वर्तुळाचे लक्ष लागले आहे.
