‘हा फक्त ट्रेलर, पुन्हा जंतर-मंतरवर येणार’; अभिजीत दिपकेंचा इशारा, शिवाजी पार्कवर CJPचे आंदोलन

मुंबई : मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉक्रोच जनता पार्टीच्या (CJP) वतीने शुक्रवारी, २ ऑक्टोबर रोजी मुंबईतील दादर येथील शिवाजी पार्कवर ‘जेल भरो आंदोलन’ करण्यात आले. पोलिसांनी आंदोलनाला परवानगी नाकारली असतानाही मोठ्या संख्येने आंदोलक शिवाजी पार्कवर जमले. लोकसत्ताच्या वृत्तानुसार, या आंदोलनात सुमारे ४ हजार आंदोलक सहभागी झाले होते. CJPचे संस्थापक अभिजीत दिपके, सहसंयोजक आशुतोष रांका, सौरव दास यांच्यासह संगीतकार विशाल ददलानी, अभिनेते नसीरुद्दीन शाह आणि अभिनेत्री शबाना आझमी आंदोलनात सहभागी झाले.

‘हा फक्त ट्रेलर’

आंदोलनाला संबोधित करताना अभिजीत दिपके यांनी मुंबई पोलिसांचे कौतुक केले आणि दिल्लीतील मागील आंदोलनाचा संदर्भ दिला. दिल्लीतील जंतर-मंतरवर पोलिसांनी आंदोलकांवर कारवाई केल्याचा आरोप त्यांनी केला. आता पुन्हा जंतर-मंतरवर आंदोलन करण्यात येईल आणि यावेळीही आंदोलन दडपण्याचा प्रयत्न करू नये, असा इशारा त्यांनी दिला.

‘हा फक्त ट्रेलर आहे. आम्ही पुन्हा जंतर-मंतरवर येणार आहोत,’ असे दिपके म्हणाले.

अमित शाह आणि फडणवीसांवर टीका

दिपके यांनी केंद्रीय गृहमंत्री अमित शाह यांच्यावरही टीका केली. जंतर-मंतरवर पुन्हा आंदोलन झाल्यास लाठीचार्ज करू नये, असे आव्हान त्यांनी दिले. तसेच मुख्यमंत्री देवेंद्र फडणवीस यांनी आंदोलकांना तीन दिवस तुरुंगात टाकण्याबाबत केलेल्या वक्तव्याचा संदर्भ देत, आपण तीन दिवस नव्हे तर तीन महिने तुरुंगात राहण्यास तयार असल्याचे दिपके यांनी म्हटले.

ज्ञानेश कुमार यांच्या राजीनाम्याची मागणी पूर्ण होईपर्यंत आंदोलन मागे घेणार नसल्याचेही त्यांनी सांगितले.

हेही वाचा –  विधान परिषद निवडणुकीसाठी काँग्रेसकडून उमेदवारांची घोषणा

मोदी सरकारवर जोरदार हल्लाबोल

अभिजीत दिपके यांनी पंतप्रधान नरेंद्र मोदी यांच्या सरकारच्या धोरणांवरही टीका केली. गांधी, डॉ. बाबासाहेब आंबेडकर आणि जवाहरलाल नेहरू यांच्या योगदानाचा उल्लेख करत त्यांनी मतदानाचा अधिकार आणि निवडणूक प्रक्रियेबाबत सरकारवर आरोप केले.

मोदींच्या फॅशन आणि स्किन केअरवरही दिपके यांनी उपरोधिक टिप्पणी केली. मतदार कोण असेल आणि कोण नसेल, हे ठरवण्याचा अधिकार कोणालाही नसावा, असा मुद्दा त्यांनी मांडला.

‘गांधी कधी मरत नाहीत’

महात्मा गांधींच्या विचारांचा संदर्भ देताना दिपके म्हणाले की, गांधींच्या हत्येमुळे त्यांचा प्रभाव संपेल असे वाटणारे चुकीचे ठरले. गांधींचे विचार आजही जिवंत असून आंदोलनात सहभागी असलेले तरुण गांधींच्या विचारांचे अनुयायी असल्याचे त्यांनी म्हटले.

गांधी भारताचा आत्मा, डॉ. आंबेडकर देशाचा कणा आणि नेहरू देशाचा मेंदू असल्याचेही दिपके यांनी भाषणात म्हटले.

विशाल ददलानींचाही आंदोलनाला पाठिंबा

संगीतकार विशाल ददलानी यांनीही शिवाजी पार्कवरील आंदोलनात सहभागी होत CJPच्या मागणीला पाठिंबा दर्शवला. उपस्थित तरुणांमध्ये भारताचे भविष्य दिसत असल्याचे सांगत, ज्ञानेश कुमार यांच्या राजीनाम्याची मागणी पूर्ण होईपर्यंत आंदोलन सुरू राहील, असे त्यांनी म्हटले.

दरम्यान, अभिनेत्री शबाना आझमी आणि अभिनेते नसीरुद्दीन शाह यांच्या उपस्थितीमुळेही आंदोलनाची चर्चा झाली. निवडणूक प्रक्रियेतील कथित अनियमितता आणि मतदार यादीतील बदलांविरोधात CJPकडून देशव्यापी आंदोलनाची घोषणा करण्यात आली आहे. या आरोपांबाबत निवडणूक आयोग आणि सरकारची भूमिका वेगळी आहे.

महाईन्यूज-X वर फॉलो करा : महाईन्यूजला instagram वर फॉलो करा