Asian Games 2026: अनंतजीत-परिनाझची ‘ब्राँझ’ कमाल; भारताच्या पदकांची संख्या १५ वर

नागोया : आशियाई क्रीडा स्पर्धा २०२६ मध्ये भारतीय नेमबाजांचा पदकांचा सिलसिला कायम आहे. गुरुवारी स्कीट मिश्र सांघिक (Skeet Mixed Team) प्रकारात अनंतजीत सिंह नारुका आणि परिनाझ धालीवाल या भारतीय जोडीने शानदार कामगिरी करत कांस्यपदक पटकावले. अंतिम फेरीत भारतीय जोडीने ४४ गुणांची नोंद करत तिसरे स्थान मिळवले. या प्रकारात चीनने सुवर्णपदक, तर दक्षिण कोरियाने रौप्यपदक मिळवले.

या कांस्यपदकामुळे आशियाई क्रीडा स्पर्धा २०२६ मधील भारताची एकूण पदकसंख्या १५ वर पोहोचली आहे. नेमबाजीच्या विविध प्रकारांत भारतीय खेळाडूंची दमदार कामगिरी सुरू असून, स्कीट प्रकारातील हे भारताचे तिसरे पदक ठरले आहे.

अनंतजीत-परिनाझची दुसरी पदक कामगिरी

अनंतजीत आणि परिनाझ या दोघांसाठीही चालू आशियाई स्पर्धेतील हे दुसरे पदक आहे. पात्रता फेरीत भारतीय जोडीने १३८ गुण मिळवत अंतिम फेरीत प्रवेश केला होता. यापूर्वी दोघांनीही आपापल्या सांघिक स्कीट प्रकारात भारताला कांस्यपदक मिळवून देण्यात महत्त्वाची भूमिका बजावली होती. आता मिश्र सांघिक प्रकारातही पदक मिळवत त्यांनी स्पर्धेतील आपली कामगिरी आणखी भक्कम केली.

यापूर्वी पुरुषांच्या स्कीट सांघिक प्रकारात भवतेघ सिंह गिल, अनंतजीत सिंह नारुका आणि मैराज अहमद खान यांच्या संघाने ३४६ गुणांसह कांस्यपदक पटकावले होते. महिला स्कीट सांघिक प्रकारात परिनाझ धालीवाल, रायझा धिल्लन आणि माहेश्वरी चौहान यांच्या संघाने ३३१ गुणांसह कांस्यपदक जिंकले.

भारतीय नेमबाजांनी स्पर्धेच्या सुरुवातीपासूनच पदकांची कमाई केली आहे. महिलांच्या १० मीटर एअर रायफल सांघिक प्रकारात भारताने रौप्यपदक मिळवले. त्यानंतर एलावेनिल वलारिवनने वैयक्तिक प्रकारात रौप्यपदक जिंकले. पुरुषांच्या १० मीटर एअर रायफल सांघिक प्रकारातही भारताच्या संघाने रौप्यपदक मिळवले, तर वैयक्तिक प्रकारात हिमांशू धिल्लनने रौप्य आणि रुद्रांक्ष पाटीलने कांस्यपदक पटकावले.

भारतीय नेमबाजांच्या सातत्यपूर्ण कामगिरीमुळे आशियाई क्रीडा स्पर्धेत भारताच्या पदकतालिकेत नेमबाजीचा वाटा महत्त्वाचा ठरत आहे.