“करार करा, नाहीतर इराण उद्ध्वस्त करू!”; UN मध्ये ट्रम्प यांचा थेट इशारा
Donald Trump | अमेरिकेचे राष्ट्राध्यक्ष डोनाल्ड ट्रम्प यांनी संयुक्त राष्ट्रांच्या महासभेत (UNGA) केलेल्या भाषणात इराणविरोधातील अमेरिकेच्या लष्करी भूमिकेचे जोरदार समर्थन केले आहे. “इराणने आमच्यासोबत करार करावा, अन्यथा ‘इस्लामिक रिपब्लिक’ला पूर्णपणे उद्ध्वस्त करण्याचा पर्याय आमच्यासमोर खुला आहे,” अशा अत्यंत कडक शब्दांत ट्रम्प यांनी तेहरानवर दबाव वाढवला. मात्र, अमेरिकेतील आगामी नोव्हेंबरच्या निवडणुकांनंतर इराणशी अखेर करार होऊ शकतो, अशी शक्यताही त्यांनी वर्तवली आहे.
भाषणात थेट सवाल उपस्थित करताना ट्रम्प म्हणाले, “इराणसमोर आता दोनच पर्याय आहेत—एकतर असा करार करायचा ज्यामुळे तो अधिक शक्तिशाली राष्ट्र म्हणून उभा राहील किंवा मी इस्लामिक रिपब्लिकला पूर्णपणे नेस्तनाबूत करू?” इराणला कोणत्याही परिस्थितीत अण्वस्त्रे मिळवू देणार नाही, हीच अमेरिकेच्या कारवाईमागील प्रमुख भूमिका असल्याचे त्यांनी स्पष्ट केले. वॉशिंग्टनने सुरुवातीला चर्चेचे मार्ग अवलंबले; मात्र शेवटी लष्करी पावले उचलावी लागली आणि त्यामुळेच इराणला अण्वस्त्र बनवण्यापासून रोखण्यात यश आले, असा दावा ट्रम्प यांनी केला.
हेही वाचा
ज्ञानेश कुमार यांच्या बरखास्तीची मागणी; संजय राऊतांचा गंभीर आरोप, जनआंदोलनाचा इशारा
आपल्या कार्यपद्धतीची इतर जागतिक नेत्यांशी तुलना करताना ट्रम्प म्हणाले, “इतरांनी केवळ चर्चा केल्या, पण मी प्रत्यक्षात कृती करून दाखवली. ज्यांनी शांततेच्या पोकळ गोष्टी केल्या, त्यांच्या जागी मी प्रत्यक्ष शांतता प्रस्थापित केली. धोक्यांकडे डोळेझाक करण्याऐवजी त्यांचा खंबीरपणे सामना करण्याचे माझे धोरण आहे.”
भारत-पाक संघर्षावर पुन्हा जुनाच दावा..
आपल्या राजनैतिक यशाचा उल्लेख करताना त्यांनी विविध देशांच्या प्रमुखांच्या विधानांचा दाखला दिला. पाकिस्तानचे पंतप्रधान शाहबाज शरीफ यांच्या हवाल्याने ते म्हणाले की, ट्रम्प यांच्यामुळे ३ कोटी लोकांचे प्राण वाचले. याशिवाय, अझरबैजान आणि आर्मेनियामधील शांतता कराराचे श्रेय स्वतःकडे घेत दोन्ही देशांच्या प्रमुखांनी आपल्या मध्यस्थीचे कौतुक केल्याचे त्यांनी सांगितले. दरम्यान, २०२५ मधील भारत-पाकिस्तान संघर्ष थांबवण्यात आपली महत्त्वाची भूमिका असल्याचा दावा ट्रम्प यांनी पुन्हा एकदा केला; तथापि, भारत कोणत्याही तिसऱ्या देशाची मध्यस्थी नेहमीच स्पष्टपणे फेटाळत आला आहे.
महाईन्यूज-X वर फॉलो करा : महाईन्यूजला instagram वर फॉलो करा
