स्मृती मानधनाचा वर्ल्ड रेकॉर्ड! मिताली राजला मागे टाकत रचला इतिहास

मुंबई : महिला टी-२० आशिया चषकात भारताची स्टार सलामीवीर स्मृती मानधना हिची बॅट चांगलीच तळपली. ३ सप्टेंबर रोजी हाँगकाँग चीनविरुद्ध झालेल्या सामन्यात मानधनाने तुफानी शतक झळकावत विक्रमांची मालिकाच रचली. तिने अवघ्या ५७ चेंडूत शतक पूर्ण केले आणि अखेर ६४ चेंडूत १४ चौकार व ७ षटकारांच्या मदतीने १२४ धावांची विक्रमी खेळी केली.

हाँगकाँग चीनने नाणेफेक जिंकून प्रथम गोलंदाजीचा निर्णय घेतला. भारताकडून स्मृती मानधना आणि शफाली वर्मा यांनी डावाची सुरुवात केली. दोघींनी पहिल्या विकेटसाठी ७४ धावांची भागीदारी करत भारताला दमदार सुरुवात करून दिली. सुरुवातीला सावध फलंदाजी करणाऱ्या स्मृतीने त्यानंतर आक्रमक फटकेबाजी करत धावांचा वेग वाढवला.

मानधनाने १९३.७५च्या स्ट्राइक रेटने १२४ धावा करताना हाँगकाँगच्या गोलंदाजांची चांगलीच धुलाई केली. अखेरच्या षटकात ती धावबाद झाली.

आशिया चषकात शतक करणारी पहिली भारतीय महिला

स्मृती मानधनाचं टी-२० आंतरराष्ट्रीय क्रिकेटमधील हे दुसरं शतक ठरलं. विशेष म्हणजे महिला आशिया चषकाच्या इतिहासात शतक झळकावणारी ती पहिली भारतीय खेळाडू ठरली आहे. या शतकी खेळीमुळे तिच्या आंतरराष्ट्रीय शतकांची संख्या आता १८ झाली आहे.

हेही वाचा –  जरांगेंच्या आंदोलनाला मोठं यश? 4 सप्टेंबरपासून कुणबी प्रमाणपत्रासाठी अर्ज करण्याचं आवाहन

मिताली राजचा विक्रम मोडला

या विक्रमी खेळीसह स्मृती मानधनाने मिताली राजचा मोठा विक्रमही मागे टाकला. हाँगकाँगविरुद्धच्या १२४ धावांनंतर मानधनाच्या महिला आंतरराष्ट्रीय क्रिकेटमधील धावांची संख्या १०,८७९ वर पोहोचली. त्यामुळे ती महिला आंतरराष्ट्रीय क्रिकेटमध्ये सर्वाधिक धावा करणारी फलंदाज ठरली आहे.

महिला आंतरराष्ट्रीय क्रिकेटमध्ये सर्वाधिक धावा :

स्मृती मानधना – १०,८७९ धावा

मिताली राज – १०,८६८ धावा

सुझी बेट्स – १०,७४० धावा

चार्लोट एडवर्ड्स – १०,२७३ धावा

स्टेफनी टेलर – १०,००७ धावा

स्मृतीच्या या धडाकेबाज खेळीमुळे भारताच्या डावाला मोठी ताकद मिळाली असून, तिच्या विक्रमांची सध्या क्रिकेटविश्वात जोरदार चर्चा सुरू आहे.

महाईन्यूज-X वर फॉलो करा : महाईन्यूजला instagram वर फॉलो करा