पंजाबच्या मसुदा मतदार यादीतून राघव चड्ढांचे नाव वगळले

नवी दिल्ली : निवडणूक आयोगाच्या विशेष सखोल पुनरीक्षण अर्थात SIR मोहिमेअंतर्गत प्रसिद्ध करण्यात आलेल्या पंजाबच्या मसुदा मतदार यादीतून राज्यसभा खासदार राघव चड्ढा यांचे नाव वगळण्यात आले आहे. त्यांच्या नावासमोर ‘Permanently Shifted’ (कायमस्वरूपी स्थलांतरित) अशी नोंद करण्यात आली आहे. यावरून चड्ढा यांनी तीव्र प्रतिक्रिया देत ही केवळ प्रशासकीय चूक नसून राजकीय सूडबुद्धीने करण्यात आलेली कारवाई असल्याचा आरोप केला आहे.

१३ ऑगस्ट रोजी प्रसिद्ध करण्यात आलेल्या ASDD (Absent, Shifted, Dead and Duplicate) यादीमध्ये राघव चड्ढा यांचे नाव समाविष्ट करण्यात आले आहे. पंजाबमधील सुमारे २०.६६ लाख मतदारांची, म्हणजेच जवळपास ९.७ टक्के मतदारांची नावे मसुदा यादीतून वगळण्यात आली आहेत.

‘माझे मतदार ओळखपत्र मोहालीत नोंदणीकृत’

राघव चड्ढा यांनी या कारवाईवर प्रश्न उपस्थित केला आहे. त्यांचे मतदार ओळखपत्र मोहाली येथे नोंदणीकृत असताना आपल्याला ‘स्थलांतरित’ कसे ठरवले जाऊ शकते, असा सवाल त्यांनी केला.

आपचे नेतृत्व आपला पक्ष सोडल्यानंतर रागाने जळत असल्याचा आरोप करत चड्ढा यांनी पक्षांतर करणाऱ्या नेत्यांविरोधात पंजाब पोलीस आणि प्रशासकीय यंत्रणेचा वापर केला जात असल्याचा दावाही केला.

हेही वाचा –  सिडको प्रशासनाचा ढिसाळ कारभार; वर्ष उलटूनही ‘सहाय्यक विकास अधिकारी’ भरती रखडली!

‘संरक्षित यादी’च्या नियमाचे उल्लंघन झाल्याचा आरोप

खासदार आणि आमदारांसारख्या लोकप्रतिनिधींसाठी ‘संरक्षित यादी’ची तरतूद असतानाही अधिकाऱ्यांनी या नियमाचे जाणीवपूर्वक उल्लंघन केल्याचा आरोप राघव चड्ढा यांनी केला आहे.

मात्र, पंजाबची मतदार यादी सध्या मसुदा स्वरूपात असून, त्याविरोधात कायदेशीर मार्गाने दुरुस्ती अर्ज सादर केल्याचे त्यांनी स्पष्ट केले आहे.

राज्यसभा खासदारकीवर परिणाम होणार नाही

पंजाबच्या मतदार यादीतून नाव वगळण्यात आले असले तरी राघव चड्ढा यांच्या राज्यसभा खासदारकीवर त्याचा थेट परिणाम होणार नाही. लोकप्रतिनिधी कायदा, १९५१ मधील २००३ च्या दुरुस्तीनुसार राज्यसभेच्या खासदारासाठी तो ज्या राज्याचे प्रतिनिधित्व करतो, त्याच राज्याचा नोंदणीकृत मतदार असणे बंधनकारक नाही.

त्यामुळे मतदार यादीतील या नोंदीमुळे त्यांच्या राज्यसभा सदस्यत्वाला तातडीचा धोका निर्माण होत नाही.

१२ सप्टेंबरपर्यंत दावे-हरकतींची संधी

SIR मोहिमेअंतर्गत प्रसिद्ध करण्यात आलेली मतदार यादी अद्याप अंतिम झालेली नाही. नागरिकांना दावे आणि हरकती नोंदवण्यासाठी १२ सप्टेंबर २०२६ पर्यंत मुदत देण्यात आली आहे. त्यानंतर प्रक्रिया पूर्ण करून ऑक्टोबर २०२६ मध्ये अंतिम मतदार यादी प्रसिद्ध केली जाणार आहे.

त्यामुळे राघव चड्ढा यांच्या नावाबाबतही दुरुस्ती अर्जावर संबंधित यंत्रणेकडून काय निर्णय घेतला जातो, याकडे आता लक्ष लागले आहे.

महाईन्यूज-X वर फॉलो करा : महाईन्यूजला instagram वर फॉलो करा