सोनल दिनुशाच्या शतकाने भारताचा विजय हुकला; कोलंबो कसोटी अखेर अनिर्णित
भारताच्या ५०३ धावांच्या डावाला श्रीलंकेचे दमदार प्रत्युत्तर; दुसऱ्या डावात ४२९ धावांवर ९ बाद, रोमांचक सामना ड्रॉ
कोलंबो : भारत आणि श्रीलंका यांच्यातील कोलंबो कसोटी सामन्यात श्रीलंकेने अखेरपर्यंत कडवी झुंज देत सामना अनिर्णित राखला. भारतीय संघ विजयाच्या उंबरठ्यावर असताना सोनल दिनुशाच्या दुसऱ्या डावातील शतकामुळे भारताच्या विजयाच्या आशांना मोठा धक्का बसला. श्रीलंकेने दुसऱ्या डावात १५४ षटकांत ९ बाद ४२९ धावा करत सामना ड्रॉ करण्यात यश मिळवले.
भारताने नाणेफेक जिंकून प्रथम फलंदाजी करण्याचा निर्णय घेतला. हा निर्णय भारताच्या फलंदाजांनी सार्थ ठरवला. देवदत्त पडिक्कलने ११७ धावांची शतकी खेळी, तर ध्रुव जुरेलने नाबाद ११५ धावा करत भारताच्या मोठ्या धावसंख्येचा पाया मजबूत केला. यशस्वी जैस्वालने ४५, कर्णधार शुभमन गिलने ५०, ऋषभ पंतने ६३ आणि रवींद्र जडेजाने ४३ धावा केल्या.
ध्रुव जुरेल आणि ऋषभ पंत यांनी महत्त्वपूर्ण भागीदारी करत भारताला ४०० धावांचा टप्पा पार करून दिला. त्यानंतर जुरेलने शानदार शतक झळकावत संघाला मोठी धावसंख्या उभारून दिली. मोहम्मद सिराजनेही त्याला चांगली साथ दिली. भारताने ९ बाद ५०३ धावांवर पहिला डाव घोषित केला.
भारताच्या मोठ्या धावसंख्येचा पाठलाग करताना श्रीलंकेची पहिल्या डावात सुरुवात खराब झाली. अवघ्या ३५ धावांवर संघाने तीन विकेट गमावल्या. त्यानंतर पासिंदू सूरियबंदारा आणि कामिंदू मेंडिस यांनी डाव सावरण्याचा प्रयत्न केला. पासिंदू ८० धावांवर बाद झाल्याने त्याचे शतक हुकले.
यानंतर सोनल दिनुशाने खालच्या फळीत आक्रमक फलंदाजी करत १०३ धावांची शतकी खेळी केली. मात्र, श्रीलंकेचा पहिला डाव २९० धावांवर संपुष्टात आला.
फॉलोऑननंतर श्रीलंकेसमोर सामना वाचवण्याचे मोठे आव्हान होते. भारतीय गोलंदाजांनी श्रीलंकेवर दबाव निर्माण केला. एकवेळ श्रीलंकेच्या केवळ चार विकेट शिल्लक होत्या आणि आघाडीही अवघी १६ धावांची होती.
मात्र, सोनल दिनुशा पुन्हा भारताच्या मार्गात अडसर ठरला. त्याने या मालिकेतील आपले तिसरे शतक झळकावत भारताच्या विजयाची संधी हिरावून घेतली. श्रीलंकेने तब्बल १५४ षटके फलंदाजी करत ९ बाद ४२९ धावा केल्या आणि अखेर सामना ड्रॉ करण्यात यश मिळवले.
भारत दुसऱ्या कसोटी विजयाच्या उंबरठ्यावर असताना श्रीलंकेने अखेरपर्यंत झुंज देत सामना वाचवला. त्यामुळे श्रीलंकेसाठी हा ड्रॉ विजयासमान ठरला.
महाईन्यूज-X वर फॉलो करा : महाईन्यूजला instagram वर फॉलो करा
