शिवसेना नेते एकनाथ शिंदेंबरोबर तुमचं काही डील झालंय का?, चंद्रकांत पाटील म्हणाले….
मुंबई : शिवसेना नेते तथा नगरविकास मंत्री एकनाथ शिंदे यांनी बंड केल्यानंतर राजकीय घडामोडींना वेग आलाय. एकनाथ शिंदे यांच्या बंडाला भाजपची फूस आहे, असा आरोप शिवसेनेने केला आहे. अशातच आम्ही एकनाथ शिंदेंना कोणताही प्रस्ताव दिला नाही किंवा त्यांनीही आम्हाला कुठलाही प्रस्ताव दिला नाही. पण त्यांनी वेगळी वाट निवडली आहे. त्यांचं पुढे काय होईल, हे सांगायला मी काही ज्योतिषी नाही, असं चंद्रकांत पाटील म्हणाले.
एकनाथ शिंदे यांची भाजपबरोबर चर्चा सुरु आहे. भाजप नेते त्यांच्या संपर्कात आहेत. भाजपशी जुळवून घेण्याचा प्रस्ताव एकनाथ शिंदे यांनी मातोश्रीला पाठवला आहे. अशा सगळ्या पार्श्वभूमीवर चंद्रकांत पाटील यांना प्रश्न विचारण्यात आले. यावर एकनाथ शिंदेंना ना कुठला प्रस्ताव दिला, ना त्यांनी आम्हाला प्रस्ताव दिला, असं स्पष्टपणे चंद्रकांत पाटील यांनी सांगितलं.
“आमची (भाजपची) आणि एकनाथ शिंदेंची चर्चा झाली नाही. कुठलीही पूर्व योजना नाही. एकनाथ शिंदे यांनी वेगळी वाट चोखाळण्याचा प्रयत्न केलाय. त्याचं पुढे काय होईल, हे सांगण्यासाठी मी ज्योतिषी नाही. पण मविआमध्ये मोठा असंतोष आहे. आम्ही आधीपासून सांगत होतो, आता ते सिद्ध झालंय. फडणवीस काय करु शकतात, हे सगळ्यांनीच पाहिलंय”, अशा शब्दात चंद्रकांत पाटील यांनी फडणवीसांचं कौतुक केलंय.
एकनाथ शिंदे यांच्या बंडांनंतर चंद्रकांत पाटील काय म्हणाले
भाजप वेट अॅण्ड वॉचच्या भूमिकेत
अडीच वर्षांपूर्वी अशास्त्रीय पद्धतीने सरकार स्थापन झालं
महिनाभरातच अनेक आमदारांनी काँग्रेस-राष्ट्रवादीसोबत न जाण्याची भूमिका घेतली होती
मविआमध्ये मोठा असंतोष, विधान परिषद निवडणूक निकालाच्या निमित्ताने समोर
आपल्या पक्षातील मानहानीला कंटाळून भाजपला मदत, चंद्रकांतदादांचा दावा
