संत तुकाराम साखर कारखाना निवडणुकीत नवलेंच्या पॅनेलची बाजी
पिंपरी |महाईन्यूज|
संत तुकाराम सहकारी साखर कारखान्याच्या पंचवार्षिक निवडणुकीत माजी खासदार व कारखान्याचे संस्थापक अध्यक्ष विदुरा उर्फ नानासाहेब नवले यांच्या सर्वपक्षीय पॅनेलने निवडणुकीत एकहाती बाजी मारली. नवले यांनी कारखान्याच्या सत्तेची किल्ली आपल्याकडे कायम ठेवण्यात यश मिळविले आहे. मात्र, सर्वांचे लक्ष लागलेल्या पौड-पिरंगुट गटात माजी खासदार अशोक मोहोळ यांचे पुत्र संग्राम मोहोळ यांचा सुमारे सहा हजार मतांनी दारुण पराभव झाला आहे. मावळ व मुळशी तालुक्याच्या कार्यक्षेत्रात असलेल्या या कारखान्याच्या निवडणुकीत मावळ, मुळशी, खेड, हवेली, शिरूरच्या ऊस उत्पादकांनी नवले यांच्या पॅनेलवर विश्वास दाखवला असून, नवले यांना सर्वाधिक ९९७४ मते मिळाली आहेत.
मागची पंचवार्षिक निवडणूक वगळता मागील २० वर्षांत संत तुकाराम साखर सहकारी कारखान्याची निवडणूक बिनविरोध झाली आहे. कारखान्याच्या निर्मितीपासून आजपर्यंत विदुरा नवले यांनी अध्यक्षपदाची धुरा सांभाळली आहे. बिनविरोध निवडूणक व्हावी, यासाठी सर्वपक्षीय नेत्यांनी प्रयत्न करून सर्वानुमते संचालक निवडीचे अधिकार उपमुख्यमंत्री अजित पवार यांना दिले होते. त्यानुसार पवार यांनी कारखान्यावर सर्व पक्षांना समाधानकारक स्थान देऊन संचालकांची नावे जाहीर केली होती. मात्र, निवडलेल्या नावावरून नाराज झालेल्या काही उमेदवारांनी बंड पुकारून निवडणूक लावली.
एकेकाळी मुळशी व जिल्ह्याच्या विकासासाठी खांद्याला खांदा लावून सातत्याने प्रयत्नशील असलेले माजी खासदार अशोक मोहोळ व विदुरा नवले दोन्ही राजकीय व मुळशीच्या लाल मातीतील अस्सल पैलवान या निवडणुकीत मात्र एकमेकांविरुद्ध दंड थोपटून उभे राहिले होते. यामुळे कारखान्याची ही निवडणूक प्रतिष्ठेची केली होती. संग्राम मोहोळ यांच्यासाठी काँग्रेस, राष्ट्रवादी काँग्रेसचे काही पदाधिकारी, कार्यकर्ते उघडपणे तसेच छुप्या पद्धतीने प्रचार करत होते. ‘सर्वपक्षीय’ अशी बिरुदावली लावलेल्या या पॅनेलमध्ये शिवसेनेला स्थानच दिले नसल्याने नवले यांच्या पॅनेलला मतदान न करण्याचे आवाहन जिल्हाध्यक्ष रमेश कोंडे व संतोष मोहोळ यांनी केले होते. आज लागलेल्या निकालामध्ये मावळ तालुक्यातील सोमाटणे-पवनानगर गटात बिनविरोध निवडून आलेल्यांमध्ये श्यामराव राक्षे, सुभाष राक्षे व नरेंद्र ठाकर यांचा समावेश आहे.
