पुरंदर तालुक्यात उद्यापासून देशातील पहिला घुबड महोत्सव
अंधश्रद्धा आणि गैरसमजांमुळे धोक्यात; उंदीर आणि घुशींच्या उपद्रवापासून रक्षण
अंधश्रद्धा आणि गैरसमज यामुळे धोक्यात असलेल्या घुबड या पक्ष्याच्या संवर्धनासाठी पुरंदर तालुक्यातील पिंगोरी येथे देशातील पहिल्या उलूक महोत्सवाचे आयोजन करण्यात आले आहे. गुरुवार (२९ नोव्हेंबर) आणि शुक्रवार (३० नोव्हेंबर) इला फाउंडेशनतर्फे हा महोत्सव भरवण्यात येत आहे. संस्कृत भाषेत घुबड पक्ष्याचे उलूक असे नाव आहे.
इला फाउंडेशनचे संस्थापक आणि पक्षी तज्ज्ञ डॉ. सतीश पांडे यांनी या महोत्सवाबाबत माहिती दिली. डॉ. पांडे म्हणाले, घुबड दिसले तर माणूस मरतो या अंधश्रद्धेतून त्याचे मढेपाखरू असे नामकरण करण्यात आले आहे. मात्र शेतातील उंदीर आणि घुशींच्या उपद्रवापासून शेतकऱ्यांची सुटका करणारे घुबड शेतकऱ्यांचा मित्र आहे. गैरसमजातून होणाऱ्या कत्तलींमुळे घुबडांच्या दोनशे बासष्ठ प्रजातींपैकी केवळ पंच्याहत्तर प्रजाती आढळून येतात. त्यातील सुमारे चाळीस प्रजाती महाराष्ट्रात आढळतात. त्यांचे संवर्धन करायचे असेल तर लहान मुलांची घुबडाशी मैत्री होणे आवश्यक आहे. याच विचारातून सुमारे दीडशे शाळांचे दहा हजार विद्यार्थी या महोत्सवामध्ये सहभागी होणार आहेत. महोत्सवाआधी केलेल्या आवाहनातून विद्यार्थ्यांनी तयार केलेली बाराशे चित्रे, पोस्टर, शिल्प, काष्ठशिल्पांचे प्रदर्शन महोत्सवामध्ये भरविण्यात येणार आहे.