चारित्र्याच्या संशयावरून पुण्यातील हडपसर येथे पती आणि पत्नीमध्ये भांडण झाली. त्यानंतर पतीने पत्नीवर वार करून स्वतः पंधराव्या मजल्यावरून उडी मारुन आत्महत्या केल्याची घटना घडली.
सुभाषचंद्र अग्रवाल वय ६५ असे आत्महत्या केलेल्या व्यक्तिचे नाव आहे. तर, जखमी झालेल्या पत्नीचे नाव रेखा अग्रवाल असे आहे.
पोलिसानी दिलेल्या माहितीनुसार,महंमदवाडी परिसरातील पेबल पार्क सोसायटीमध्ये १५ व्या मजल्यावर राहणारे सुभाषचंद्र अग्रवाल आणि त्यांच्या पत्नी रेखा यांच्यामध्ये सतत भांडणे होत असत. आज देखील त्या दोघांमध्ये कडाक्याचे भांडण झाले होते. यावेळी संतप्त झालेल्या सुभाषचंद्र यांनी पत्नी रेखा यांच्यावर चाकुने वार केले. यामुळे रेखा ह्या रक्ताच्या थारोळ्यात पडल्या. त्यानंतर सुभाषचंद्र यांनी त्यांच्या घराच्या गॅलरीमधुन उडी मारून आत्महत्या केली. या घटनेत सुभाषचंद्र यांचा घटनास्थळीच मृत्यू झाला असून त्यांच्या पत्नी रेखा यांना स्थानिक रूग्णालयात दाखल करण्यात आल्याचे सांगण्यात आले आहे.
