कार्यकर्त्यांनो सबुरीने घ्या – माजी आमदार विलास लांडेचे आवाहन

लोकसभा निवडणुकीत राष्ट्रवादी काँग्रेस पक्षाच्या उमेदवारीवरुन माजी आमदार विलास लांडे यांच्या समर्थकांनी राष्ट्रवादीच्या पक्षश्रेष्ठींविरोधात एल्गार केला आहे. शिरुर लोकसभा मतदार संघात ‘उपरा’ उमेदवाराचे काम करणार नाही, असा इशारा देवून अनेक ‘पोस्ट’ सोशल मीडियावर व्‍हायरल केल्या जात आहेत. यावरुन पक्षक्षेष्ठीकडून विचारणा झाल्यानंतर लांडे यांनी मवाळ भूमिका घेतली आहे.

यासंर्दभात माजी आमदार विलास लांडे यांनी म्हटले की, आजवर माझ्यासोबत राष्ट्रवादी काँग्रेस पार्टीची पताका मिरवत पक्षसंघटन मजबूत करण्यासाठी अखंड आणि अविरत राबलेल्या माझ्या सर्व जिवाभावाच्या कार्यकर्ता मित्रांनो !

गेल्या अनेक दिवसांपासून आपण लोकसभा निवडणुकीत शिरूर मतदारसंघामध्ये आपल्या पक्षाची ताकद वाढवण्यासाठी जीवाचं रान करीत आहात, आपण माझ्या पाठीशी उभे राहिलात आणि मी लोकभावनेचा आदर ठेवून लोकसभा निवडणुकीसाठी प्रतिस्पर्ध्यांविरोधात दंड थोपटले. या समाजातील विविध घटकांची भेट घेऊन, चर्चा करून, अनेक ठिकाणी समेट घडवून आणत असताना आपला पाठिंबा आणि निस्वार्थी सहकार्य मला मिळाले आणि या संघर्षाला अजून बळ मिळत गेले.

आपल्या राष्ट्रवादी काँग्रेस पार्टीच्या वतीने लोकसभा निवडणुकीत उमेदवार कोण असेल? ही संभ्रमावस्था अजूनही कायम असताना; आपण माझ्या नावाचा पुकार बुलंद ठेवलात, त्याबद्दल मी आपला शतशः आभारी आहे. तरीही उमेदवारीच्या अनुषंगाने आपण कुठेही, कुठल्याही  समाज माध्यमांवर आपल्या पक्षाची प्रतिमा खराब होईल असे वर्तन करू नये, ही कळकळीची विनंती, करुन कार्यकर्त्यांनो… सबुरीने घ्या, पक्षकार्य ताकदीने करा, असा सुचनाही लांडे यांनी दिली आहे.