करोना संकटातही टाटा मोटर्स कंपनी कामगारांना देणार ‘दिवाळी बोनस’
पिंपरी |महाईन्यूज|
करोनाच्या संकटकाळातही टाटा मोटर्स कंपनीने दिवाळीसाठी प्रत्येकी ३५ हजार २०० रुपये बोनस जाहीर केला आहे. त्याचा लाभ सुमारे सात हजार कामगारांना होणार असून, दसऱ्यापूर्वी बोनसची रक्कम कामगारांच्या हातात मिळणार आहे.
कंपनी व्यवस्थापन आणि कामगार संघटनेचे पदाधिकारी यांची नुकतीच ऑनलाइनच्या माध्यमातून बैठक झाली. या वेळी प्लांट हेड अशोकसिंह, जयदीप देसाई, सरफराज मणियार, रवी कुलकर्णी, युनियनचे अध्यक्ष सचिन लांडगे, संतोष दळवी, अशोक माने, आबिदअली सय्यद उपस्थित होते.
वेतन आणि बोनससंदर्भात कंपनीचे तीन वर्षांसाठीचे धोरण ठरलेले आहे. परंतु, करोनाच्या संकटकाळात जाहीर झालेल्या लॉकडाउनमध्ये अनेक ठिकाणी धोरणांमध्ये बदल करणे व्यवस्थापनाला भाग पडले. वाहन क्षेत्रातील मंदीपाठोपाठ करोनाच्या संकटामुळे कामगार वेतन कपात, बोनस नाही अशा कटू निर्णयांना सामोरे जावे लागेल, अशी भीती कामगार वर्गाला होती. परंतु, व्यवस्थापनाने करोनाच्या संकटकाळात कामगार कामावर आले नसले, तरी एकाही दिवसाच्या वेतनात कपात केली नाही. घरी राहणाऱ्या कामगारांना शंभर टक्के वेतन दिले. त्यामुळे कामगार वर्गात समाधानाचे वातावरण होते.
बिझनेस स्कोर कार्डचा (बीएससी) आधार घेऊन बोनसचे सूत्र ठरविण्यात आले आहे. त्यानुसार गेल्या वर्षी ३८ हजार २०० रुपये बोनस मिळाला होता. आताही ३५ हजारांहून अधिक रक्कम जाहीर झाली आहे. ती दसऱ्यापूर्वी कामगारांच्या हातात मिळणार आहे, त्यामुळे कंपनी परिवारामध्ये आनंदाचे वातावरण आहे.
करोना संकटकाळात कामगारांच्या वेतनात एक रुपयादेखील कपात न करता कंपनीचे सर्वेसर्वा रतन टाटा यांनी कामगारांना दिलासा दिला होता. आता बोनस जाहीर करून दुधात साखर घातली आहे. असे आदर्शवत व्यक्तिमत्त्व लाभल्याचे आम्ही अभिमानाने नमूद करतो. दिवाळीच्या पार्श्वभूमीवर कामगारांमध्ये आनंदाचे वातावरण निर्माण झाले आहे.
- सचिन लांडगे, अध्यक्ष, टाटा मोटर्स एम्प्लॉइज युनियन
