पुणे |महाईन्यूज|
दौंड-पुणे-दौंड या दरम्यान दररोज अप-डाउन करणाऱ्या अत्यावश्यक सेवेतील प्रवाशांना रेल्वेने प्रवास करण्याची मुभा देण्यात आली आहे. या प्रवासासाठी त्यांना सोमवारनंतर पोलिस पास देण्यात येणार असून, रेल्वेच्या कर्मचाऱ्यांची ने-आण करणाऱ्या गाडीतूनच हे प्रवासी प्रवास करू शकतील.
अत्यावश्यक सेवेतील कर्मचाऱ्यांना दौंड-पुणे दरम्यान रेल्वेने प्रवास करता यावा, या मागणीसाठी गेल्या दीड महिन्यापासून सातत्याने जिल्हाधिकारी कार्यालय आणि रेल्वे विभागीय कार्यालयाकडे दौंड-पुणे-दौंड प्रवासी संघाच्या वतीने पाठपुरावा करण्यात आला. तसेच, दौंडचे आमदार राहुल कुल यांच्यासह संघाच्या पदाधिकाऱ्यांनी पोलिस आयुक्त अमिताभ गुप्ता यांच्याशीदेखील चर्चा केली होती.
त्या वेळी दौंड ते पुणेदरम्यान प्रवास करणाऱ्या अत्यावश्यक सेवेतील कामगारांना रेल्वेने प्रवास करण्यास मान्यता देण्यासाठी रेल्वेच्या पुणे विभागाच्या रेणू शर्मा यांच्याशी चर्चा करण्याचे आश्वासन गुप्ता यांनी दिले होते. त्यानुसार, १६ ऑक्टोबर २०२० रोजी दौंड-पुणे प्रवासाला मान्यता देण्यात आली आहे. पोलिसांच्या www.punepolice.in या वेबसाइटवर अत्यावश्यक सेवेतील कामगारांनी त्यांची माहिती पाठवल्यावर ‘क्यूआर कोड’ तयार होईल आणि हा कोड रेल्वेच्या तिकीट खिडकीवर दाखवून पास मिळणार आहे.
दौंडवरून सकाळी पावणेआठ वाजता गाडी सुटते, तर पुणे स्थानकातून सायंकाळी गाडी सुटते. या गाडीने दौंड, पाटस, केडगाव, कडेठाण, यवत, खुटबाव, उरळी, लोणी, मांजरी, हडपसर या स्थानकांवरून प्रवाशांना प्रवास करण्याची संधी मिळणार आहे. दरम्यान, दौंड-पुणे-दौंड प्रवासी संघाचे कार्याध्यक्ष गणेश शिंदे, अय्युब तांबोळी, राहुल तोटे आणि सचिव विकास देशपांडे यांनी यासाठी पाठपुरावा केला होता.
