उद्धव ठाकरेंचे आमदार-खासदार फोडले, आता बाळासाहेबांचे जेष्ठ नेतेही गळाला लावण्याचे प्रयत्न
मुंबई :एकनाथ शिंदे यांनी नुकतीच निवडणूक आयोगाकडे धाव घेत शिवसेना पक्ष आणि धनुष्यबाण हे चिन्ह आपल्याला देण्यात यावे, अशी मागणी केली होती. त्यानंतर निवडणूक आयोगही सक्रिय झाला होता. मात्र, शिवसेनेने याविरोधात सर्वोच्च न्यायालयात धाव घेत याचिका दाखल केली. ही याचिका सर्वोच्च न्यायालयाने दाखल करुन घेतल्याने आता शिवसेना कोणाची, याचा फैसलाही सर्वोच्च न्यायालयात होण्याची दाट शक्यता आहे. या पार्श्वभूमीवर एकनाथ शिंदे हे दिल्लीपासून गल्लीपर्यंतचा शिवसेना पक्ष आपल्याच बाजूने कसा आहे, हे सिद्ध करण्यासाठी भेटीगाठी घेत आहेत. मागील आठवड्यात एकनाथ शिंदे यांनी उद्धव ठाकरेंशी एकनिष्ठ असलेले खासदार गजानन कीर्तिकर यांची भेट घेतली. तर आज मुख्यमंत्री शिंदे यांनी बाळासाहेबांच्या सोबतचे पहिल्या फळीतील सेना नेते लीलाधर डाके यांची भेट घेतली. त्यांच्या तब्येतीची विचारपूस केली. त्यांना दिर्घायुष्याच्या शुभेच्छा दिल्या. त्यानंतर मुख्यमंत्री मनोहर जोशी यांच्या भेटीसाठी रवाना झाले आहेत.
राज्यात सत्तांतर झाल्यानंतर अनेक नगरसेवक आणि स्थानिक पदाधिकाऱ्यांनी उद्धव ठाकरे यांना अलविदा करून एकनाथ शिंदे गटाचा हात धरला आहे. मात्र, शिवसेनेतील जुनी खोडं असणाऱ्या निष्ठावंतांचा पाय अजूनही उद्धव ठाकरेंच्या गोटातून निघत नाही. यापैकी काही जुनेजाणते नेते हे शिवसेनेच्या राष्ट्रीय कार्यकारिणीचा भाग आहेत. न्यायालयात पक्षांतर बंदी कायद्याचा कीस पडल्यास शिवसेनेची राष्ट्रीय कार्यकारिणी आणि शिवसेनेची घटना, हे दोन घटक महत्त्वपूर्ण ठरू शकतात. त्यामुळे सर्वोच्च न्यायालयाच्या सुनावणीपर्यंत शिवसेनेतील जमतील तितके निष्ठावंत आपल्या बाजूला वळवण्यासाठी एकनाथ शिंदे यांचे जोरदार प्रयत्न सुरु केले आहे.
या पार्श्वभूमीवर एकनाथ शिंदे यांनी आज शिवसेनेचे ज्येष्ठ नेते लीलाधर डाके यांची भेट घेतली. लीलाधर डाके हे शिवसेनेतील बुजुर्ग नेत्यांपैकी एक आहेत. काही दिवसांपूर्वीच शिंदे यांनी खासदार गजानन किर्तीकर यांची भेट घेतली होती. ही सर्व मंडळी शिवसेनेतील जुनीजाणती आणि निष्ठावंत म्हणून ओळखली जातात. या लोकांना आपल्या बाजूने वळवल्यास उद्धव ठाकरे यांना सोडून एकनाथ शिंदे गटात येण्यास कचरत असलेल्या शिवसैनिकांची मानसिकता कदाचित बदलू शकते, असा अंदाज आहे.
मुख्यमंत्री शिंदेंनी काल रामदास कदम यांची भेट घेतली
“रामदास कदम यांच्या वाढदिवसानिमित्त त्यांच्या मुंबईतील निवासस्थानी उपस्थित राहून त्यांना मनःपूर्वक शुभेच्छा दिल्या. राज्यात शिवसेना, भाजपा व सहयोगी पक्षांचे युती सरकार स्थापन झाल्यावर शिवसेनेचा भगवा झेंडा मंत्रालयावर डौलाने फडकत आहे. रामदास भाई कदम ही मुलुखमैदानी तोफ पुन्हा एकदा पक्षबांधणीसाठी मैदानात धडाडावी अशी अपेक्षा व्यक्त करत आपल्या राजकीय आयुष्याची ही नवी इनिंग त्यांनी पुन्हा एकदा जोशात सुरू करावी”, अशा शुभेच्छा याप्रसंगी मुख्यमंत्री एकनाथ शिंदे यांनी रामदास भाईंना दिल्या.
