खामगाव-शेगाव या मार्गावरील कनारखेड फाट्यानजीक एक कार व दोन दुचाकींचा तिहेरी अपघात
![Triple accident involving one car and two two-wheelers near Kanarkhed road on Khamgaon-Shegaon road](https://mahaenews.com/wp-content/uploads/2022/08/Triple-accident-involving-one-car-and-two-two-wheelers-near-Kanarkhed-road-on-Khamgaon-Shegaon-road.jpg)
बुलढाणा : खामगाव-शेगाव या मार्गावरील कनारखेड फाट्यानजीक एक कार व दोन दुचाकींचा तिहेरी अपघात झाला आहे. या भीषण अपघातात एक युवक ठार झाला असून गर्भवती महिला गंभीररित्या जखमी झाल्याची घटना घडली आहे.
मिळालेल्या माहितीनुसार, सोळंके पती-पत्नी दुचाकीवरून काल दुपारी शेगावकडे जात होते. यावेळी एका भरधाव वेगातील कारने त्यांच्या दुचाकीला धडक दिली. यामुळे सदर दुचाकी दुसऱ्या एका दुचाकीला धडकली. या तिहेरी अपघातात सौरभ प्रकाश अल्हाट (वय २८) आणि गर्भवती असलेल्या नेहा सोळंके (रा. शेलूद ता. चिखली) हे गंभीररित्या जखमी झाले.
जखमींना तातडीने सामान्य रुग्णालयात भरती करण्यात आले होते. मात्र सौरभ याची प्रकृती गंभीर असल्याने त्याला येथील सिल्व्हरसिटी हॉस्पीटलमध्ये भरती करण्यात आले होते. तेथे त्याच्यावर शस्त्रक्रिया देखील झाली. मात्र दुपारी सौरभ अल्हाट याचा उपचारादरम्यान मृत्यू झाला.
दरम्यान, या घटनेने शहरात हळहळ व्यक्त होत आहे. याप्रकरणी अद्याप गुन्हा दाखल झालेला नव्हता.