सोलापूर ST अपघात, ३५ हून अधिक जखमी, मुख्यमंत्र्यांकडून दखल, जखमींना ५० हजारांची तत्काळ मदत
मुंबई : सोलापूर-गाणगापूर एसटी बसला अक्कलकोट जवळ आज सकाळी झालेल्या अपघाताची दखल मुख्यमंत्री एकनाथ शिंदे यांनी घेतली आहे. अपघातात जखमी प्रवाशांना तातडीने अक्कलकोट किंवा जवळपासच्या रुग्णालयांत हलवून शासकीय खर्चाने योग्य त्या उपचारांची व्यवस्था करण्याचे निर्देश प्रशासनाला दिले आहेत. त्याचप्रमाणे अपघातात ज्यांना गंभीर दुखापत झाली आहे अशा ठराविक किंवा मोठा अस्थिभंग झालेल्या प्रवाशांना मुख्यमंत्री सहायता निधीतून ५० हजार रुपये अधिकची आर्थिक मदत करण्यात यावी असे निर्देशही मुख्यमंत्र्यांनी दिले आहेत.
सोलापूर-गाणगापूर एसटी बसला अक्कलकोट-मैंदर्गी रस्त्यावर अपघात झाला. या अपघातात ३५ हून अधिक जण जखमी झाल्याची माहिती आहे. सकाळी साडे दहाच्या सुमारास अक्कलकोट-मैंदर्गी रस्त्यावरील देशमुख शेतालगत बस पलटी होऊन ही मोठी दुर्घटना घडली. या बसमध्ये जवळपास ७० प्रवासी प्रवास करत असल्याची माहिती आहे. मिळालेल्या माहितीनुसार, चार ते पाच प्रवाशांची प्रकृती ही गंभीर आहे. याप्रकरणाची मुख्यमंत्री एकनाथ शिंदे यांनी गंभीर दखल घेतली असून तातडीने जखमींना जवळपासच्या रुग्णालयांमध्ये हलवण्याचे आदेश दिले आहेत.
अपघात झाल्याचे कळताच मुख्यमंत्र्यांनी सोलापूर जिल्हाधिकारी तसेच एसटी महामंडळ व पोलिसांकडून याची माहिती घेतली व जखमी तसेच इतरही प्रवाशांची व्यवस्था करावी अशा सूचना दिल्या. अपघातातून जखमी प्रवाशांना तातडीने अक्कलकोट किंवा जवळपासच्या रुग्णालयात हलवून योग्य त्या उपचारांची व्यवस्था करण्याचे मुख्यमंत्री शिंदे यांनी प्रशासनाला निर्देश दिले आहेत.
आमदार सचिन कल्याणशेट्टींची मुख्यमंत्र्यांना माहिती
अपघातानंतर आमदार सचिन कल्याणशेट्टी यांनी मुख्यमंत्री एकनाथ शिंदेंना फोन करून अपघाताची माहिती दिली. अपघातात जखमींना मदत करण्याचे मुख्यमंत्र्यांनी आश्वासन दिले. जिल्हाधिकाऱ्यांना देखील तात्काळ जखमींची भेट घेऊन माहिती सादर करण्याच्या सूचना दिल्या. ट्रॉमा केअर संदर्भात देखील लवकरच बैठक लावून विषय मार्गी लावण्याचे आश्वासन मुख्यमंत्र्यांनी दिले, अशी माहिती अक्कलकोटचे आमदार सचिन कल्याणशेट्टी यांनी दिली.
