मिरजेत शिवसेनेचे कार्यकर्ते संतप्त, भाजप आमदाराच्या कार्यालयावर टरबूज फेक आंदोलन
सांगली : एकनाथ शिंदे यांच्या बंडाचे पडसाद मिरजेत उमटले. संतप्त शिवसेना कार्यकर्त्यांनी थेट भाजप आमदारांच्या कार्यालयावर हल्लाबोल केला. शिवसेना कार्यकर्त्यांनी मिरजेत “टरबूज” फेकून आंदोलन केले आहे. भाजप आमदार सुरेश खाडे यांच्या कार्यालयाच्या दारात आणि फलकावर संतप्त शिवसेना कार्यकर्त्यांनी टरबूज फेकून फोडली आहेत.
एकनाथ शिंदे यांच्या बंडामागे भाजप असल्याचा थेट आरोप करत मिरजेत शिवसेना कार्यकर्त्यांनी रस्त्यावर उतरून निषेध नोंदवला आहे. यावेळी संतप्त झालेल्या शिवसेना कार्यकर्त्यांनी मिरजेतील भाजप आमदारांच्या कार्यालयावर हल्लाबोल करत कार्यालयावर टरबूज फेकून निषेध व्यक्त केला आहे. यावेळी आमदार सुरेश खाडे यांच्या कार्यालयाच्या दारात टरबूज फोडण्यात आला. त्याचबरोबर कार्यालयाच्या शेजारी असणाऱ्या फलकावर देखील टरबूज फेकून फोडण्यात आला.
महाराष्ट्रात देवेंद्र फडणवीस यांच्या माध्यमातून फोडाफोडीचे राजकारण भाजप करत आहे. त्यांचा निषेध म्हणून हे आंदोलन करण्यात आल्याचं शिवसेनेच्या पदाधिकाऱ्यांनी सांगितलं. या आंदोलनादरम्यान तणावाचे वातावरण निर्माण झाले. आक्रमक झालेल्या शिवसेनेच्या पदाधिकाऱ्यांसह काही कार्यकर्त्यांना मिरज पोलिसांनी ताब्यात घेतलं आहे.
