तेलही गेले, तुपही गेले… आता संजय राऊत यांचेही संसदेचे नेतेपद जाणार! शिंदे गटाच्या खासदारांचे संसदीय सचिवांना पत्र
मुंबई : मुख्यमंत्री एकनाथ शिंदे यांच्या शिवसेनेने खासदार संजय राऊत यांच्याकडून शिवसेनेचे संसदीय पक्षनेतेपद हिसकावून घेण्याची प्रक्रिया सुरू केली आहे. खासदारांनी संसदीय सचिवांना पत्र लिहून राऊत यांच्या जागी शिंदे समर्थक गजानन कीर्तिकर यांची संसदीय पक्षनेतेपदी नियुक्ती करावी, अशी मागणी केली आहे. शिंदे गटाने यापूर्वीच संसद भवनातील शिवसेनेच्या कार्यालयावर ताबा मिळवला आहे. तेथून उद्धव ठाकरे आणि आदित्य ठाकरे यांची छायाचित्रे काढून त्याजागी एकनाथ शिंदे आणि त्यांचे गुरू आनंद दिघे यांची छायाचित्रे लावण्यात आली आहेत. लोकसभा सदस्यांमध्ये फूट पडल्यानंतर 13 लोकसभा खासदार शिंदे यांच्या पाठीशी असून उद्धव गटाकडे पाच लोकसभा सदस्य शिल्लक आहेत. त्याचवेळी राज्यसभेत शिवसेनेचे तीन सदस्य असून तिघेही उद्धव यांच्यासोबत आहेत. त्यापैकी एक संजय राऊत आहेत, ते पक्षाचे मुखपत्र सामनाचे संपादक देखील आहेत.
मुख्यमंत्री एकनाथ शिंदे यांच्या नेतृत्वाखालील शिवसेनेने मंगळवारी केंद्रीय संसदीय कामकाज मंत्री प्रल्हाद जोशी यांना लोकसभेचे खासदार गजानन कीर्तिकर यांची शिवसेना संसदीय पक्षाच्या नेतेपदी नियुक्ती करणारे पत्र सादर केले. शिवसेना (UBT) खासदार संजय राऊत (राज्यसभा) हे आतापर्यंत शिवसेना संसदीय पक्षाचे नेते होते. गेल्या आठवड्यात झालेल्या पक्षाच्या खासदारांच्या बैठकीत कीर्तिकर यांची संसदीय पक्षाच्या नेतेपदी निवड करण्यात आल्याचे शिवसेना नेत्यांनी सांगितले.
खासदारांना व्हिपचे पालन करण्याच्या सूचना
शिवसेनेचे खासदार राहुल शेवाळे म्हणाले की, संसदीय पक्षाच्या नेत्याची नियुक्ती करण्याचा अधिकार शिवसेनेचे प्रमुख नेते एकनाथ शिंदे यांच्याकडे आहे. त्यांनी खासदार गजानन कीर्तिकर यांची नियुक्ती करून केंद्रीय संसदीय कार्यमंत्र्यांना पत्र दिले आहे. आम्ही प्रक्रिया सुरू केली आहे. संसदीय पक्षाचा नेता हा पक्षाचा लोकसभा आणि राज्यसभेतील नेता असतो. त्यामुळे राज्यसभेतील सर्व खासदारांनाही आमच्या व्हिपचे पालन करावे लागेल. निवडणूक आयोगाने आपला निर्णय दिला आहे (शिंदे गटाला पक्षाचे नाव आणि चिन्ह वाटप) त्यामुळे शिवसेनेच्या नावावर आणि चिन्हावर विजयी होणाऱ्या सर्वांना त्याचे पालन करावे लागेल.
उद्धव गटाचे सहा खासदार शिल्लक आहेत
लोकसभेतील शिवसेनेचे गटनेते शेवाळे म्हणाले, व्हीप जारी करण्याबाबत अद्याप कोणताही निर्णय झालेला नाही. उत्तर-पश्चिम मुंबईतील खासदार कीर्तिकर शिंदे यांच्या नेतृत्वाखालील सेनेत सामील होणारे शिवसेनेचे तेरावे लोकसभेचे खासदार होते. कीर्तिकर बाहेर पडल्याने उद्धव ठाकरे गटात सहा खासदार शिल्लक राहिले आहेत. विभाजनापूर्वी शिवसेनेकडे महाराष्ट्रातून १८ आणि दादरा आणि नगर हवेलीतून कलाबेन देऊळकर असे एकूण १९ लोकसभा खासदार होते.
संसद भवनातील खोली क्रमांक 128
निवडणूक आयोगाच्या निर्णयानंतर लोकसभा सचिवालयाने गेल्या आठवड्यात संसद भवनातील शिवसेनेचे कार्यालय मुख्यमंत्री शिंदे यांच्या नेतृत्वाखालील शिवसेनेला दिले. लोकसभा सचिवालयातील उपसचिव सुनंदा चॅटर्जी यांनी शेवाळे यांना लिहिलेल्या पत्रात म्हटले आहे की, संसद भवनातील १२८ क्रमांकाची खोली शिवसेना पक्षाला देण्यात आली आहे. यापूर्वी शिवसेनेचे दोन्ही गट कार्यालय वापरत असत, मात्र आता उद्धव गटाच्या खासदारांना संसद भवनात कार्यालय नाही.
