शरद पवार आणि एकनाथ शिंदेंच्या भेटीची बातमी चुकीची; हे वृत्त चुकीचे असल्याचं स्पष्ट
![News of meeting between Sharad Pawar and Eknath Shinde is wrong; It is clear that this news is wrong](https://mahaenews.com/wp-content/uploads/2022/07/News-of-meeting-between-Sharad-Pawar-and-Eknath-Shinde-is-wrong-It-is-clear-that-this-news-is-wrong.jpg)
मुंबई : राज्याचे मुख्यमंत्री एकनाथ शिंदे यांनी काल राष्ट्रवादी काँग्रेसचे अध्यक्ष शरद पवार यांची भेट घेतल्याचे वृत्त काही माध्यमांनी दिले होते. मात्र हे वृत्त चुकीचे असल्याचं स्पष्ट झालं आहे. स्वत: एकनाथ शिंदे यांनी याबाबत खुलासा केला आहे. ‘महाराष्ट्र टाइम्स ऑनलाइन’ने भेट झाल्याची बातमी दिली नव्हती. काही इतर ऑनलाइन माध्यमांनी ही बातमी दिली होती.
एकनाथ शिंदे यांनी याबाबत खुलासा करताना म्हटलं आहे की, ‘राष्ट्रवादी काँग्रेसचे अध्यक्ष शरद पवार यांना मी भेटल्याची बातमी काही प्रसारमाध्यमांनी दिलेली आहे. ही बातमी संपूर्णपणे चुकीची असून त्यात अजिबात कोणतेही तथ्य नाही. या बातमीसोबत व्हायरल झालेला फोटो हा मी त्यांना त्यांच्या वाढदिवसानिमित्त शुभेच्छा द्यायला गेलो होतो तेव्हाचा आहे. आमच्यात अद्याप अशी कोणतीही भेट झालेली नसून याबाबत आलेल्या कोणत्याही बातम्यांवर कोणीही विश्वास ठेवू नये.’
दरम्यान, एकनाथ शिंदे यांनी ११ नोव्हेंबर २०२१ ला शरद पवार यांची भेट घेतल्यानंतर राष्ट्रवादीच्या अधिकृत ट्विटर हँडलवरून या भेटीची माहिती देण्यात आली होती. या भेटीचा फोटो आता व्हायरल केला जात असून एकनाथ शिंदे यांनी मुख्यमंत्री झाल्यानंतर पवार यांची भेट घेतल्याचं सांगितलं जात आहे.