शेतकऱ्याचे घराला लागलेल्या आगीत लाखो रुपयांचे नुकसान; रिझर्व्ह बँकेचा शेतकऱ्याला असा दिलासा
![Millions of rupees loss in farmer's house fire; Reserve Bank's relief to the farmer](https://mahaenews.com/wp-content/uploads/2022/07/Millions-of-rupees-loss-in-farmers-house-fire-Reserve-Banks-relief-to-the-farmer.jpg)
जळगावः पोहरे (ता. चाळीसगाव) येथील शेतकऱ्याचे घराला लागलेल्या आगीत लाखो रुपयांचे नुकसान झाले होते. या आगीत त्यांचे साडेसात लाख रुपयेही जळाले. त्यापैकी काही नोटा अर्धवट जळाल्या होत्या. या अर्धवट जळालेल्या नोटा रिझर्व्ह बँकेने स्वीकारत शेतकऱ्याला नव्या नोटा दिल्या आहेत. जळालेल्या नोटा, कागदपत्रांची पूर्तता केल्याने शेतकऱ्याला तीन लाख रुपये बदलून मिळाले आहेत. यामुळे या शेतकऱ्याला मोठा दिलासा मिळाला आहे.
फेब्रुवारीत पोहरे (ता. चाळीसगाव) येथील शेतकरी केशव राघो महाजन यांच्या घराला गॅस लिकेजमुळे लागलेल्या आगीत घरातील रोख ७ लाख ७० हजार रुपयांसह दागिने जळून खाक झाले होते. या आगीत त्यांच्याकडे ३ लाख ७५ हजारांच्या अर्धवट जळालेल्या नोटाच शिल्लक होत्या. घटनेची माहिती मिळाल्यानंतर चाळीसगाव तालुक्याचे आमदार मंगेश चव्हाण यांनी २८ फेब्रुवारी रोजी केशव महाजन यांची भेट घेऊन नुकसानीची पाहणी केली. त्याचवेळी आमदार चव्हाण यांनी आगीत अर्धवट जळालेल्या नोटा रिझर्व्ह बँकेकडून बदलवून आणता येतील असे सांगत, त्या नोटा आपल्या ताब्यात घेतल्या होत्या. त्यानुसार आमदार चव्हाण यांनी याबाबत पाठपुरावा करून आगीत जळालेल्या नोटा रिझर्व्ह बँकेकडून बदलून तीन लाख रुपये शेतकऱ्याला मिळवून दिले आहेत.
नागपूर येथील कार्यालयात पाठपुरावा
आमदार मंगेश चव्हाण यांनी आपल्या स्वीय सहायकाला नागपूर येथे जळालेल्या नोटा घेऊन पाठवले. ‘तुम्ही ऑनलाइन अर्ज करा, तसेच संबंधित शेतकऱ्याचे बँक डीटेल्स व ओळखीचे कागदपत्रे आम्हाला द्या, त्यानंतर या विषयावर आमची कमिटी स्थापन होईल. अर्जाची खातरजमा केल्यानंतर जळालेल्या नोटांच्या बदल्यात किती टक्के रक्कम परत द्यायची हे समिती ठरवते’, असे रिझर्व्ह बँकेच्या अधिकाऱ्यांनी सांगितले. कागदपत्रांची पूर्तता केल्यानंतर नुकतेच केशव माळी यांच्या बँक खात्यात रिझर्व्ह बँकेतर्फे तीन लाख रुपये जमा करण्यात आले आहेत.