कोरोना प्रतिबंधात्मक लसीकरणात महाराष्ट्र अव्वल, चार कोटी लस मात्रांचा टप्पा
![Maharashtra leads in corona preventive vaccination, a phase of four crore vaccine doses](https://mahaenews.com/wp-content/uploads/2021/07/कोरोना-प्रतिबंधात्मक-लसीकरणात-महाराष्ट्र-अव्वल-चार-कोटी-लस-मात्रांचा-टप्पा.jpg)
मुंबई: कोरोना प्रतिबंधात्मक लसीकरणात महाराष्ट्राने आज पुन्हा विक्रम प्रस्थापित करीत लस मात्रांचा चार कोटींचा टप्पा पार केला. आज दुपारपर्यंत झालेल्या लसीकरणानंतर राज्यात आतापर्यंत 4 कोटी 24 हजार 701 लसींचे डोस देण्यात आले आहेत, असे आरोग्य विभागाचे अपर मुख्य सचिव डॉ.प्रदिप व्यास यांनी सांगितले.
देशामध्ये कोरोना प्रतिबंधात्मक लसीकरणात महाराष्ट्र आघाडीवर असून आज दुपारी 2 वाजेपर्यंत झालेल्या लसीकरणानंतर राज्याने आतापर्यंत दिलेल्या एकूण डोसेसची संख्या चार कोटींवर गेली. त्यामध्ये पहिला डोस घेतलेल्या नागरिकांची संख्या तीन कोटी सहा लाख 99 हजार 339 तर दुसरा डोस घेतलेल्यांची संख्या 93 लाख 25 हजार 362 एवढी आहे. आज दुपारपर्यंत राज्यात एक लाख 20 हजार नागरिकांना लस देण्यात आली असून सायंकाळपर्यंत हा आकडा वाढू शकेल, असे डॉ.व्यास यांनी सांगितले.
दरम्यान महाराष्ट्रात सोमवारी 6,017 लोक संक्रमित आढळले. 13,051 लोक बरे झाले आणि 66 लोकांचा मृत्यू झाला. येथे आतापर्यंत 62.20 लाख संक्रमणाच्या विळख्यात सापडले आहेत. यामध्ये 59.93 लाख लोक बरे झाले आहेत, तर 1.27 लाख लोकांचा मृत्यू झाला आहे. सध्या 96,375 लाख रुग्णांवर उपचार सुरू आहेत.