केतकी चितळेचा लॅपटॉप, मोबाइल जप्त; शरद पवारांबाबत आक्षेपार्ह पोस्ट प्रकरण
![Ketki Chitale's laptop, mobile seized; Offensive post case about Sharad Pawar](https://mahaenews.com/wp-content/uploads/2022/05/Ketki-Chitales-laptop-mobile-seized-Offensive-post-case-about-Sharad-Pawar.jpg)
ठाणे | राष्ट्रवादी काँग्रेसचे अध्यक्ष शरद पवार यांच्याविषयीच्या फेसबूकवरील आक्षेपार्ह पोस्टप्रकरणी गुन्हे शाखेच्या युनिट-१ने तपासाचा वेग वाढवला आहे. पोलिसांचे पथक अभिनेत्री केतकी चितळे हिला घेऊन सोमवारी तिच्या कळंबोळी येथील घरी गेले. यावेळी घरातून लॅपटॉप आणि मोबाइल फोन जप्त करण्यात आला. सायबरच्या पथकाकडून त्यांचे परीक्षण केले जाणार आहे.
गुन्हे शाखेच्या युनिट-१ने केतकीला शनिवारी अटक केली होती. न्यायालयाने चार दिवसांची पोलिस कोठडी दिल्यानंतर सोमवारी दुपारी पोलिस तिला घेऊन तिच्या कळंबोलीतील घरी धडकले. यावेळी घराची झडती घेण्यात आल्याची माहिती सूत्रांनी दिली. जवळपास दीड तास ही कार्यवाही चालू होती. घरातून लॅपटॉप आणि एक मोबाइल जप्त केल्यानंतर पोलिसांचे पथक पुन्हा केतकीला घेऊन सायंकाळी ठाण्यात दाखल झाले. याआधीही तिचा एक मोबाइल जप्त करण्यात आला होता
तपासामध्ये ज्या-ज्या गोष्टी निष्पन्न होतील आणि जे दोषी असतील त्यांच्यावर कायदेशीर कारवाई करण्यात येईल, असे वरिष्ठ पोलिस निरीक्षक अनिल देशमुख यांनी सांगितले. या प्रकरणाचा तपास करण्यासाठी सायबरसह एकूण चार पथके तयार करण्यात आली आहेत, असेही ते म्हणाले.
पोस्ट डिलिट करण्यास नकार
न्यायालयात स्वतः बाजू मांडणारी केतकी अद्यापही या प्रकरणात वकील न घेण्याच्या भूमिकेवर ठाम आहे. तिच्या फेसबूक पेजवर संबंधित वादग्रस्त पोस्ट अद्याप कायम आहे. ती डिलिट करणार नाही, अशी भूमिका तिने घेतल्याचे सूत्रांचे म्हणणे आहे.
वकिलाच्या अस्तित्वाविषयी संशय
केतकीने फेसबूकवर केलेली पोस्ट जानेवारी २०२०मधील असल्याचे विश्वासनीय सूत्रांनी सांगितले. त्यामुळे ही पोस्ट कोणी करायला लावली का, याची चौकशी गुन्हे शाखेकडून करण्यात येत आहे. तसेच संबंधित पोस्टखाली नाव असलेल्या वकिलाविषयीची अद्याप माहिती समोर आलेली नाही. त्याच्या अस्तित्वाविषयीच पोलिसांना संशय आहे.