मुंबईच्या मशिदींवरील बेकायदा भोंगे हटवावेत; मोहित कंबोज यांची मागणी
मुंबई | मुंबई पोलीस आयुक्त संजय पांडे यांनी शहरातील वाहतूक कोंडी, ध्वनी प्रदूषण आदी प्रश्न सोडवण्यासाठी चांगले उपक्रम सुरू केले आहेत. ध्वनी प्रदूषणाच्या मुद्द्याला अनुसरूनच भाजप नेते मोहित कंबोज यांनीही एक मागणी केली आहे. मुंबईतील मशिदींवर लावण्यात आलेले अनधिकृत भोंगे हटवले पाहिजेत, असे कंबोज म्हणाले. या मागणीसंदर्भात एक व्हिडिओ ट्विट करून, ध्वनी प्रदूषणाविरोधात मुंबई पोलीस आयुक्तांनी नवीन मोहीम हाती घ्यायला हवी, अशी विनंती त्यांनी केली आहे.
मुंबई शहरात मशिदींवर लावण्यात आलेले भोंगे हटवले पाहिजेत, अशी मागणी मोहित कंबोज यांनी शनिवारी पत्रकार परिषद घेऊन केली होती. या मागणीचा पुनरुच्चार कंबोज यांनी केला आहे. यासंदर्भात एक व्हिडिओ त्यांनी ट्विट केला आहे. मशिदींवरील बेकायदा भोंगे हटवले पाहिजेत. मुंबईचे पोलीस आयुक्त संजय पांडे हे ध्वनी प्रदूषणाविरोधात चांगले उपक्रम राबवत आहेत. मला असे वाटते की, मुंबईत मशिदींवर बेकायदा भोंगे लावले आहेत, ज्यांच्यामुळे ध्वनी प्रदूषण होते. त्याचा परिणाम अभ्यास करणारे विद्यार्थी, वयोवृद्ध मंडळींसह अनेकांवर होतो, ते भोंगे हटवले पाहिजेत. पोलीस आयुक्तांनी त्यावर कारवाई केली पाहिजे. मुंबई ध्वनी प्रदूषणमुक्त केली पाहिजे. आम्ही कोणत्याही समाज आणि धर्माविरोधात नाही. अजान झाली पाहिजे, पण ती मशिंदींमध्ये, अशी माझी विनंती आहे, असे कंबोज म्हणाले.
नवाब मलिक यांच्यावरही निशाणा
मोहित कंबोज यांनी राज्याचे मंत्री नवाब मलिक यांच्यावरही निशाणा साधला. भ्रष्टाचारातून नवाब मलिक आणि त्यांच्या कुटुंबातील सदस्यांनी कमावलेल्या बेनामी संपत्तीची माहिती ईडीने मुंबईच्या रजिस्ट्रारकडे मागितली आहे. तुमच्या पापाचा हिशेब होणार, असं कंबोज यांनी नमूद केलं आहे.
