हेल्मेट सक्ती!, दुचाकी विक्रेत्यांना केली मोठी सूचना, मुंबई पोलिस अॅक्शन मोडवर
![Helmet forced !, Big notice to two-wheeler sellers, Mumbai Police on Action mode](https://mahaenews.com/wp-content/uploads/2022/06/Helmet-forced-Big-notice-to-two-wheeler-sellers-Mumbai-Police-on-Action-mode.jpg)
मुंबई : मुंबईमध्ये दुचाकीवरील सहप्रवाशालादेखील हेल्मेट सक्तीचे करण्यात आल्याने दुचाकी विक्रेत्यांनी ग्राहकांना दोन हेल्मेट विकावित, अशी सूचना मुंबई पोलिसांनी सर्व विक्रेत्यांना केली आहे. मोटर कायद्याचा हवाला देत दुचाकी उत्पादक कंपनीने दोन हेल्मेट देणे बंधनकारक असल्याचे पोलिसांनी म्हटले आहे. एकीकडे सहप्रवाशाला करण्यात आलेल्या हेल्मेटसक्तीमुळे मुंबईकरांमध्ये नाराजी असतानाच दुसरीकडे मुंबई पोलिस मात्र ही सक्ती अधिक कडक करण्यासाठी पावले उचलताना दिसत आहेत.
मुंबई पोलिसांनी २५ मे रोजी परिपत्रक जारी करून सहप्रवाशाला हेल्मेटसक्ती करण्यात येणार असल्याचे जाहीर केले होते. या आदेशाची अंमलबाजवणी करण्यासाठी पोलिसांनी १५ दिवसांची मुदत दिली होती. हेल्मेट न घालणाऱ्या सहप्रवाशांवर पोलिसांनी ९ जूनपासून दंडात्मक कारवाई सुरू केली. हे सुरू करतानाच दुचाकी खरेदी करताना कंपन्या दोन हेल्मेट देत नसल्याचे अनेक ग्राहकांच्या तक्रारीवरून पोलिसांच्या लक्षात आले. त्यामुळे दुचाकी उत्पादक कंपन्या आणि विक्रेत्यांना पोलिसांनी ही सूचना केली आहे.
पोलिसांनी याविषयी एक परिपत्रक प्रसिद्ध केले असून त्यात केंद्रीय मोटर वाहन कायद्याचा हवाला दिला आहे. या कायद्यान्वये उत्पादक कंपनी आणि विक्रेत्याने ग्राहकाला सुरक्षेसाठी हेल्मेट देणे आवश्यक आहे. त्यामुळे ग्राहकांनी दुचाकी खरेदी करताना विक्रेते किंवा कंपनीकडून दोन हेल्मेटची मागणी करावी, असे पोलिसांनी पत्रकात नमूद केले आहे.