अनोळखी व्यक्तींना घरात घेताना सावधान; बीडमध्ये पती- पत्नीवर प्राणघातक हल्ला
![Be careful when taking strangers into the house; Assassination of husband and wife in Beed](https://mahaenews.com/wp-content/uploads/2022/07/Be-careful-when-taking-strangers-into-the-house-Assassination-of-husband-and-wife-in-Beed.jpg)
बीड: केज तालुक्यात पती- पत्नीवर प्राणघातक हल्ला करण्यात आल्याची गंभीर घटना घडली आहे. या घटनेत पतीचा जागीच मृत्यू झाला असून पत्नी गंभीर जखमी आहे. या प्रकरणी पोलीस प्रशासनाचा शोध सुरू आहे. पाणी पिण्याच्या बहाण्याने चोरटे घरात घुसल्याची प्राथमिक माहिती मिळत आहे.
याबाबत सविस्तर माहिती अशी की, ११ जुलै सोमवारी रोजी संध्याकाळी सुमारे ७. १५ वाजेच्या दरम्यान चिंचोली माळी येथील रस्त्यावर घर असलेल्या पांडुरंग राऊत यांच्या घरी तोंडाला स्कार्फ बांधलेले तीन अनोळखी व्यक्ती गेले. या अनोळखी व्यक्तींनी पिण्यासाठी पाणी मागितले. राऊत यांच्या पत्नी शशिकला पाणी आणण्यासाठी स्वयंपाकघरात गेल्या. त्यानंतर पाणी घेऊन येत असताना अज्ञात व्यक्तींनी त्यांच्या गळ्यातील दागिने हिसकावून घेतले. यावेळी शशिकला यांचे पती पांडुरंग राऊत विरोध करत असताना अज्ञातांनी त्यांना चाकूने भोसकले.
चाकूचा घाव वर्मी बसल्याने पांडुरग राऊत यांचा जागीच मृत्यू झाला. तर या झटापटीत शशिकला राऊत या गंभीर जखमी झाल्या आहेत. मारेकऱ्यांनी खून करुन पळून जात असताना कोणाला दिसू नये आणि ओळख पटू नये म्हणून घरातील विजेचा बल्ब काढून अंधार केला. या घटनेने परिसरात एकच खळबळ माजली आहे. पोलिसांनी अज्ञात आरोपींचा तपास घेण्यासाठी जागोजागी नाकाबंदी केली आहे.