भाजपच्या बड्या नेत्यासोबत ओळख, मंत्रीपद मिळवून देतो; राज्यातल्या दोन आमदारांकडे मागितले १०० कोटी
![Acquaintance with senior BJP leader, gets ministerial position; 100 crore was asked from two MLAs in the state](https://mahaenews.com/wp-content/uploads/2022/07/Acquaintance-with-senior-BJP-leader-gets-ministerial-position-100-crore-was-asked-from-two-MLAs-in-the-state.jpg)
मुंबईः भारतीय जनता पक्षाच्या दिल्लीतील बड्या नेत्यासोबत जवळीक असल्याचे सांगून, महाराष्ट्रात स्थापन झालेल्या नव्या सरकारमध्ये मंत्रीपद मिळवून देण्यासाठी दोन आमदारांकडे १०० कोटींची मागणी करणाऱ्या चौघांना मुंबई पोलिसांनी अटक केली. भाजपचे आमदार राहुल कुल यांनी यासंदर्भात मुंबईचे पोलिस आयुक्त विवेक फणसळकर यांना माहिती दिली होती. त्याआधारे खंडणीविरोधी पथकाने ओबेरॉय हॉटेलमध्ये कुल आणि आमदार जयकुमार गोरे यांच्यासमोरच सापळा लावून ही कारवाई केली. सध्याच्या वेगवान राजकीय घडामोडींच्या पार्श्वभूमीवर हा प्रकार समोर आला आहे.
आमदार राहुल कुल यांच्या स्वीय सचिवाला रियाज शेख असे नाव सांगणाऱ्या तरुणाचा फोन आला. आमदारसाहेबांशी बोलणे झाले असून, खास त्यांच्या कामासाठी दिल्लीहून मुंबईत आलो आहे, असे त्याने सांगितले. स्वीय सचिवांनी हा निरोप कुल यांना दिला. त्यावर चार दिवसांपूर्वी आपणासही या व्यक्तीचा फोन आला होता व मंत्रीपदासाठी १०० कोटी रुपये मागत होता, असे ते म्हणाले. कुल यांनी स्वीय सचिवाला या व्यक्तीला भेटण्यासाठी बोलाविण्यास सांगितले. त्यानुसार १७ जुलैला त्याला ओबेरॉय हॉटेलमध्ये भेटण्यास बोलावण्यात आले. या दिवशी कुल यांनी रियाजसोबत जवळपास दीड तास चर्चा करून ही रक्कम १००वरून ९० कोटी रुपयांवर आणली. त्यावर २० टक्के म्हणजे १८ कोटी रुपये काम होण्याआधी द्यावे लागतील, अशी अट रियाज याने ठेवली. कुल यांनी ती मान्य करून दुसऱ्या दिवशी पैसे घेण्यासाठी बोलावले. एका बाजूला पैसे देण्याची तयारी दाखवतानाच दुसऱ्या बाजूला त्यांनी याबाबतची माहिती मुंबई पोलिसांना दिली.
असा लागला आरोपींचा पत्ता
रियाज हा पैसे घेण्यासाठी १८ जुलैला दुपारी दीडच्या सुमारास हॉटेल ओबेरॉय येथे पोहोचला. यावेळी कुल यांच्यासोबत स्वीय सहायक आणि आमदार जयकुमार गोरेदेखील होते. आमदारांनी इशारा करताच साध्या वेशात सापळा लावून बसलेल्या पोलिसांनी रियाजला ताब्यात घेतले. त्याची कसून चौकशी केली असता ठाण्याच्या योगेश कुलकर्णी आणि सागर संगवई यांनी पैसे मिळाल्यास मंत्रिपद मिळवून देतो, असे सांगितल्याची माहिती त्याने दिली. त्यानुसार कुलकर्णी आणि संगवई यांना पकडण्यात आले. त्यांच्या चौकशीमध्ये नागपाडा येथील जाफर उस्मानी याचे नाव समोर आले. उस्मानीचा ओळखीचा व्यक्ती ५० ते ६० कोटी रुपये घेऊन मंत्रीपद मिळवून देत असल्याचे दोघांनी सांगितले. या माहितीवरून पोलिसांनी जे. जे. मार्ग परिसरातून उस्मानीची धरपकड केली. या चौघांकडून सात मोबाइल हस्तगत करण्यात आले असून, यांचे दिल्लीपर्यंत जाळे आहे का, याचा तपास पोलिस करीत आहेत.